20 August 2017

පොලීසියේ භාවනා පංතිය , හෙළුවෙන් නැටීම සහ හෙළුවට හිනා යාම

මේසයක් ඉස්සරහ පුරුදු කට්ටියක් වාඩි වෙලා ඉන්නවා .  මැද  ඉන්නේ කැබිනට් ප්‍රකාශකයන් . දෙපැත්තේ නිකන් සැරියුත් මුගලන් වගේ ආමි එකෙනුයි පොලිසියෙනුයි . ඉස්සරහ ඉඳගෙන ප්‍රශ්න අහන්නෙත් පුරුදු කට්ටියම තමා . විහිලු ප්‍රශ්න අහනවා විහිලු පිළිතුරු දෙනවා ... උන්ගේ ජෝක්ස් වලට උන්ම හිනා වෙනවා .

පොලීසියේ භාවනා පංති .. කණ  පැලෙන්න දෙකක් දී , සිත ඒකාග්‍ර කිරීම .... නිවන් දැක්කීම ....මජ්ජ පමා දට්ඨානා වේරමණී ...පොලිස් මාජ්ජ ප්‍රකාශක ජෝක්ස්  එක උඩ එක ගොඩ ගහනවා ...කාගේදෝ හෙළුවක් පෙනෙනවා 
උත්තර දෙන අයත්  හිනා වෙනවා , ප්‍රශ්න අහන උනුත් හිනා වෙනවා ...අපි ???  ...අපිත් හිනාවෙනවා 



***
ස්ට්‍රීප් ක්ලබ් එකක ( ඔව් ඔව් අර ගෑනු වේදිකාවක් උඩට නැගලා ඇඳි වත  , සංගීත රිද්මයට ගලවලා හෙළුවෙන් නටන්නේ  ) , වේදිකාව මත  ගැහැනියක්  රෙදි ගලවන කොට , ඉස්සරහ ඉඳ ගෙන ඉන්න පිරිමි ..

පොඩ්ඩක් කතාවෙන් එලියට පනින්න අවසර .. අතුරු කතාවක්  මතක් උනා 

ඉස්සර යතාර්තවාදියෙකුගේ කතා කියලා කතා ලියාපු නිහාල් , මේ වගේ කතාවක් ලියලා තිබ්බා . මේ වගේ තැනකට ගිහිල්ලා ඇවිල්ලා ඇතිවුන පස්චාත්තාපය ගැන . නිහාල් දැන් ලියන්නේ නෑ .. ඒත්  වෙන අවතාරයකින් සැරිසරනවද  කියන්න මම දන්නේ නෑ ..

නැවැත්තුවේ වේදිකාව ඉස්සරහ ඉන්න පිරිමි ගැන කියලනේ .. ඉතින් පිරිමි , මනසින් අනේකවිද දේවල් කරන ගමන් , හිතන්නේ අර ගෑනි තමයි   හෙළුවෙන් කියලා ... ඒත්  ඒ වේදිකාව උඩ  රෙදි ගලවන ගැහැණිය දන්නවා , හෙළුවෙන් ඉන්නේ වේදිකාව යටට වෙලා බලන් ඉන්න එවුන් කියලා 

***

අනුන්ගේ හෙලුවට හිනා වෙන අපි, හිනාවෙන්නේ උගේ හෙලුවට නෙමෙයි , 
එක්කෝ අපි හෙළුවෙන් ඉන්න බව අමතක කරන්න,  නැත්නම් අපි හෙළුවෙන් ඉන්නවා මතක් කරලා ... අපි හෙළුවෙන් ඉන්නකොට කොච්චර විහිලු සහගතද කියලා හිතිලා 

13 August 2017

ගෑනු පිරිමි , සිංහල දෙමළ සහ විජේදාස රාජපක්ෂ (එකයට රත්නේ සමග සල්ලාපයක්)

මචං  මේ 

ඕ 

අනාගතේ මිනිස්සුන්ගේ ආයුශ  අවුරුදු එකසිය පනහ දෙසිය වෙනවා කියන්නේ 

ඔව් ඔව් පන්සලේ හාමුදුරුවොත් කිව්වා 

ඒ විකාර නෙමෙයි , දැන් කෘතීම ඉන්ද්‍රියන් , අවයව වවන්න ගත්තම , ඒවා බද්ධ කරන්න ගත්තම , දිගටම අලුත් වෙවි ජීවත් වෙන්න පුළුවන් වෙයි . එතකොට  මරණය කියන්නේ චොයිස් එකක් වෙනවා 

අනේ උඹේ එක යට කතා 

මචන් එතකොට සෙක්ස් මොනවගේ වෙයිද 

ඒ කිව්වේ 

නෑ මං කිව්වේ දැන් මේ අවුරුදු තිහ හතළිහේ කසාද වල ඇතුලෙත් ඩිස් ඩි ඩි  ඩින් බෝරින් වෙන එකේ ..අවුරුදු දෙසීයක් තිස්සේඕක කොහොම කරන්නද ..

මම හිතන්නේ මිනිස්සු බහු විවාහ සංස්කෘතියකට මාරු වෙයි 

එහෙමත් වෙයි ... නැත්නම් එකම විවාහය ඇතුලේ  ලිංග විපර්යාස වෙයි 

ඒ කිව්වේ 

ඒ කිව්වේ මුලින් අම්මා ළමයි දෙන්නෙකුට පස්සේ , තාත්තා වෙලා ...තාත්තා අම්මා වෙයි 

හිහි ... අර ගමේ ඉස්කෝලේ මනමේ ප්‍රොඩක්ෂන් එකේ තුනයි තිහේ වැදිරජා හයයි තිහේ ෂෝ එකට මනමේ කුමාරිට ඇන්දා වගේ 

එහෙම වුනාම ඔය ස්ත්‍රීවාදය , පුරුෂාධිපත්‍ය ඔක්කොම අහෝසි වෙනවා 

හිහි 

මචං  ඇත්තටම ලංකාවේ ඕක කරන්න ඕනේ ජාතිකත්වයට ... හැම පුරවැසියෙක්ම මුල් අවුරුදු දහයක් සිංහල  ඊට පස්සේ අවුරුදු දහයක් දෙමළ  ආයේ අවුරුදු දහයක් මුස්ලිම් ...ජාතික ප්‍රශ්නය අහෝසියි 

පිස්සු කතා .. එතකොට ජාතික අනන්‍යතාවය අච්චාරුවක් වෙනවානේ ...

ඉතින් හොඳයි නේ 

අනේ පලයන් .. දැන් ඔය වගේ ඒවා කොහේද වෙන්නේ
... ඒක නෙමෙයි උඹ හිතන්නේ විජේදාස රාජපක්ෂ මොකාටද එන්න හදන්නේ 

31 July 2017

පොලු සහ ඔලු

Are you talking to me ? එහෙම ඇහුවේ ඩි නීරෝ    Taxi Driver  එකේ  . ඒත් මේ ලංකාවේ නේ . 
පැත්තක ගලවලා තිබුන බාටා සෙරෙප්පු දෙකට කකුල් රිංගන ගමන් මිනිහා ඇහුවේ " සර් හයර් එකක් යන්නද ?" කියලා 

(දැන් වාර්ෂික වගේ වෙලා තියෙන නිවාඩුවට ලංකාවට ගියවිට ,  මගේ ප්‍රියතම දෙයක් තමයි ත්‍රීවිල් රියදුරන් සමග අල්ලාප සල්ලාපය. ඉදින්  නැති ගමනුත් යොදා ගන්නේ ඒ සඳහාමයි  . 

ඒ කැමැත්ත   රටේ ඕනෑම දෙයක් ගැන විශේසඥ දැනුමක් ඔවුනට ඇති හෙයින්ද නැතිනම් මා  කැමති දේවල් , මා  කැමති ලෙවල් එකෙන් කතා කරන්න හැකිවෙන නිසාද  නැත්නම් මගේ පින්තූර  ගැනීමට පහසුම ප්‍රවාහන මග ඒ නිසාද නැතිනම් ඒ අල්ලාප සල්ලාපයෙන් මට අමුතු චූන් එකක් ලැබෙන නිසාද කියලා මම හරියටම නොදනිමි .)

ඉතින් ඔන්න අපි ගමන පටන් ගත්තා 

***
තෙල් ප්‍රශ්නේ විසඳිලාද දැන් 

පැය දෙකක් හිටියා සර් පෝලිමේ . ඊට පස්සේ  ආමි එක බැස්සුවනේ දැන් දෙයි ඔය *** ගේ පුතාලට නිල් වෙන්න 

හ්ම්ම් 

ඒ විතරක් නෙමෙයි සර් , කොළොන්නාවේ මහජනයාත් පොලු අරන් ගිහින් ඕකුන්ට නෙලන්න 

කුරුඳු පොලු ?

යහ පාලනේ නේ ඒවා නෑ දැන්, මැහෝගනී මම හිතන්නේ 

ඇයි දන්නේ නෑ ඔය වර්ජනේ ?

අර සයිටම් එකට නේ 

එතකොට අර දොස්තරලත් වර්ජනේ කරන්නේ ඒකට නේද 

නෑ උන් වර්ජනේ කරන්නේ ලංකාවේ තෙල් ලිං ටික චීනට දෙනවට 

ලංකාවේ ? තෙල් ලිං ?

ඔව් ඇයි අවුල්ද ?

***


රියදුරු සකි ගුවන් විදුලියේ හඬ වැඩි කරනවා ..

"මේ පැරණි රසාංග තීරයයි . මේ ගීතය පැරණි චිත්‍රපටයකින් .. "

පොල්ලෙන් නෙලා නෙලා 
ඔලුකටු පුපුරනා 
ප්‍රෝජාතාන්තර වාදේ 
විඳිනෙම් රඟ සොබා 

සම්පත්  ගොඩක්  ගසා 
පොළියට හිලව් තියා 
ලාබේට චීනාටම විකුනමු පනේ 

පදමට ඇඹුල් දමා 
පස්සෙන් ගෑස් ගසා 
රජ වෙන හීනේක  සුවෙයි  විපක්සේ 

රට යන තාලේ 
මේකයි රාළේ 
හැමදා පහුවෙනකොට 
ගුටි තමයි 

පොල්ලෙන් නෙලා නෙලා 
ඔලුකටු පුපුරනා 
මොන බල්ලෝ බිරුවත් 
දිගටම ගැල යනා 

යහපාලනේ කියා 
තෙම තෙම සබන් ගගා 
බාල්දියෙන් හිල් වෙන්නම
ගැහුවනෙ බොලේ  

පොල්ලෙන් නෙලා නෙලා 

***

අම්මපා සර් මමත් හොඳ දෙකේ පොල්ලක් අරං ගෙදර තියා ගන්නවා 

අර මොකටද ?

දැන් ඔය අපේ බදු මුදලින් ඉගෙනගත්ත දොස්තරලා අපේම අයිතීන් වෙනුවෙන් ස්ට්‍රයික් කරලා අපිවම අපහසුතාවයට පත් කරන කොට , එතකොට අපේ හොඳට තෙල් විරුවෝ අපිවම බයිට් එකට ගන්නකොට , එතකොට දුෂණය නැතිකරනවා කියපු එවුන් " තමුසෙලා පගාව දෙනවනම් අපිට ඕවා කියන්න එපා " කියනකොට, 
මහා ආර්ථික  මොලයක් කිව්ව එකාගේ ආර්ථික උපායමාර්ගය   ගමේ බබානිසා කරන්නැහේ  ගේ දොර විකුණනලා /  උගසට තියලා කන බොන එකම බව පේන  කොට , මේ අගාධයට ඇදලා දාපු එවුන් පැත්තක ඉඳන් " අනේ බලන්නකෝ නේද ඉතින් .." කෝචෝක් කරන කොට , ඔය පොල්ල අරන් ...

ඔහෙත් යනවා අර කොළොන්නාවේ ජනයා වගේ ?

නෑ සර් දෑත බදලා මගේ ඔලුවටම එකක් ගහ ගන්නවා 


පලි 

පොලු සහ ඔලු අතර ඇති සම්බන්ධය අනාදිමත් කාලයක සිට සිරිලක පැවතෙන්නෙකි . එක කලෙක සෝභිත හාමුදුරුවන්ටද , සරච්චන්ද්‍ර උන්නැහේටද පොලු පාර දුන්නේ කාණුවේ වැටෙන්නය . ඒ බව පත්තර වල ලියවුනාට එදා ගුටි කෑ  සාමන්‍ය  ජනයා ගැන කවුරුවත් දන්නේ නැත . රතු පස්වල වේවා , ඉන්ධන සංස්ථාවේ වේවා , අරලිය ගහ මන්දිරය ඉදිරිපිට වේවා  පොලු පහර ඔලුවකට වැදෙන විට  ගේම ෆෝම් කරන උන් පිටිපස්සේ සිට සිනහ වෙති .

එමෙන්ම "ඕකුන්ට ඔහොම තමයි උත්තර දෙන්න ඕනේ කියන විට " පොලු සහ ඔලු අතර සම්බන්ධය එකට එකක් නොව බහුතරයකට එකක් ( Not one to one but one to many ) බව අපට අමතක වේ


22 July 2017

කුනු

කුනු උනත් විවිධාකාරය
නිකං ( උපමේයක්) වගේ

[දිගට ලියා ගෙනම යම්
හිස්තැනම 
වරහන් තුල ඉතිරි කොට
සුදුසු වචනය
පය ගැටේවී
ඔහොම යද්දී]

පොලීතීන්
මහ පන්තියේ
නොදිරයි
වැලලුවත්
කාලාන්තරයකට
මෘත සරීරත්
ප්රතිචක්රීකරනය වී
පරම්පරාවම අලුත්වෙන

කඩදාසි
අහිංසක
මැද පන්තියේ
වැඩක් නැති
අකුරැවැල්
සිරස්තල හංවඩු
දරා තම දිවි පුරා
බලාපොරොත්තු වේයෝ කා
දිරායන
නොදැනීම

ඉතුරැ කුනු නම්
ඔක්කොම 
එකම බක්කියට
හීන කුනුවී ඉස්ම
හීතල පොලොවටම උරන
ජිවීතත් එහෙමම
පනුවන් ගසා
කොම්පෝස්ට්ම වෙන

*අර වරහන ඇතුලට "මිනිස්සු" ගැලපේද මන්දා



30 June 2017

ජනතාවගේ පැත්තේ සිට ගැනීම

කතාව 1 

බැරේ තොප්පියක්  ලස්සනට ඇලේට හිසේ ලා ගත් අයෙක් කැමරා අටවා ගත් පිරිසක් ඉදිරියේ ප්‍රකාශයක් කරන්නේය .

" .. මේ රටේ ක්‍රිකට් ක්‍රීඩකයෝ කියන්නේ රටට අපමණ අගයක් ගෙනත් දුන් කට්ටියක්. .. ඒ අතරින් මාලිංග කියන්නේ විශිෂ්ටයෙක් ..කවුරු හරි ඔහුට අකටයුත්තක් කරනවා නම් මම හිටගන්නේ ඔහුගේ පැත්තේ "

" ඒ වුනාට ඔබතුමා කිව්වා නේද , බඩ  බස්සගත්තේ නැත්තන් ටීම් එකෙන් හලනවා කියලා "

" නෑ මම මාලී ට හරි ආදරෙයි ... අයියා කෙනෙක් වගේ මම නිකන් අවවාදයක් කලේ බඩ පොඩ්ඩක් වැඩියි කියලා .."

" ඒවුනාට ඔබ තුමාට අර , රිලව් කතාවක් කියලා නේද , මේ විනය ක්‍රියාමාර්ග ගැනුනේ "

" මාලී උනත් දෙයක් කියනකොට , අර සංගා වගේ කඩ්ඩෙන් කිව්වා නම් අවුලක් නෑ නේ ... කාටවත් තේරෙන්නේ නෑනේ ...අඩුම ගානේ ඔය විනය තකන කට්ටියටවත් නොතේරෙන්න  ... දැන් ඉතින් මේකෙන් මටත් පාරේ යන්න බෑ ... මහජන දිනයටත් එකෙක් ආවා ගහක බෙනයක් තියනවා කියාගෙන ..... හැබැයි මේ කරලා තියෙන වැඩේ නම්  වැරදියි "

ඉතින් ක්‍රීඩා ඇමතිතුමා හැටියට ඔබ තුමා මොකද කරන්නේ 

මම හිටගන්නේ ජනතාවගේ පැත්තේ 

ඒ කිව්වේ ?

මේ නැගී එන ජනතා විරෝධය පැත්තේ තමයි මාත් හිටගන්නේ 


ඒ උනාට ඔය විරෝධතා වලින් කිසිම ඵලයක් නෑනේ 

( මද සිනාවක් ).. ඒ වුනාට මතක ඇතිව ලියා ගන්න මම ජනතාවගේ පැත්තේ කියලා 

*****

කතාව 2

තවත් වොයිස් කට් එකක් දෙන තැනකි . සුදු අත්කොට කමිසයක හා සුදු සරමක් ඇඳ ගත් අයෙක් ප්‍රශ්න වලට පිළිතුරු දෙන්නේය 

" ඔබ තුමාගේ අයිටම් එකට , සෑහෙන විරුද්ධතාවයක් නැගීගෙන එනවා .. මොකද ඔබතුමාට මේ ගැන කියන්න තියෙන්නේ .?"

" ඔව් මමත් විරුද්ධයි ..."

" ඒ කිව්වේ "

" මේ වගේ දුෂීත අයිටම් එකක් පවත්වා ගෙන යනවට මමත් විරුද්ධයි "

එතකොට කාගේද වැරැද්ද 

" මේ ප්‍රශ්නෙදි මම නම් ඉන්නේ ජනතාවගේ පැත්තේ ...මේකේ සම්පුර්ණ වැරැද්ද ආණ්ඩුවේ ...ඊටත් වඩා වැරැද්ද ඒ ආණ්ඩුව පත් කරපු ජනතාවගේ . අනිත් එක ආණ්ඩුවක් පිහිටවන්න චන්ද ගන්න බැරිවෙච්ච විපක්ෂයේ ..."

එතකොට ජනතාව විරෝධතා පාන්නේ ජනතාවටමද 

ඒ වුනාට මම නම් ජනතාවගේ පැත්තේ ... මේ වගේ දූෂිත ආයතන පවත්වා ගෙන යන අයට හොඳ දඬුවමක් දෙන්න ඕනේ 

මොන වගේ දඬුවමක්ද 

දැඩි දඬුවම් දෙන්න ඕනේ  ..නීතිය ක්‍රියාත්මක කරන්න ඕනේ ...ජනාධිපති මන්දිරේට ගෙන්නලා , සීනී අඩු තේකක්  දීලා , තදින් අවවාද කරලා .... ඔක්කොම බැංකු ණය කපා හැරලා ..ඔක්කොම සබ්බ සකලමනාවම එක්ක රටින් පිටිවහල් කරන්න ඕනේ ඔය එංගලන්තේට , ඇමරිකාවට හරි ඔස්ට්‍රේලියාවට හරි 

***

කතාව 3

ජනාධිපති තුමා පත්තරය දිග හැරියේය ....

ලේකම් තුමා ...ප්‍රකාශයක් නිකුත් කරන්න හිටං ...මේ උමා ඔය ප්‍රශ්නේදී මම ඉන්නේ ...

( එක්කෝ ඒ කතාව ඕනේ නැත )


පලි 

කවුදෝ , කිසියම් දාක කියූ කතාවක් මට සිහිවේ 

එකමත් එක රටේ , එක රජෙක් සිටියේය . අධික බදු පනවා ජනතාවට අධික පීඩනයක් කළ බැවින් රටේ ජනතාව කැරලි ගසන්නට විය . කැරැල්ල නැගලා ගිහින් , බුරුතු පිටින් මිනිස්සු ඇවිත් රජ මාලිගාව වට කළහ .   රජ්ජුරුවෝ බොඩි ගාඩ් ලා වල්ලකින් වටවී රාජ මාලිගේය . ටිකකින් පිරිස ඇතුළට කඩා පැන්නාහ . දැන් බොඩි ගාඩ්ලා වලල්ල  , රජු හා ජනතාව අතර ෆේස් ඕෆ් එකකි .. ටිකකින් බොඩි ගාඩ්ලා ජනතාවගේ පැත්තට හැරී රජුගේ පැත්තට අවි දික් කර ගත්හ . දැන් රජා පිරිසටත් බිත්තියකටත් මැදිවී සිටින්නේය 

"මොකද ප්‍රශ්නේ ? " රජා ඇසුවේය 

" අපි ඔබ තුමා ගේ පාලනය පිළිගන්නේ නෑ ... අපි ඔබතුමාව මින් පස්සේ අනුගමනය කරන්නේ නෑ  "

" හරි එහෙම නම් මමත් , ජනතා මතයට හිස නමලා ජනතාවගේ පැත්තේ හිට ගන්නවා "

රජා ජනතාවට පිටුපස හරවා බිත්තිය දෙසට හැරුනේය . දැන් රජා මුලින් , ඉන් පසු ජනතාව , හිස් බිත්තියට මුහුණ ලා සිටිති . ජනතාව නැවතත් රජාගේ පිටිපසින් පෙළ ගැසී සිටිති . ඔවුනට හොඳින් පෙනෙන්නේ රාජාගේ පශ්චාත් පෙදෙසයි 

18 June 2017

ස්ටින්ග් , පියවරුන්ගේ දිනය සහ රැවුල බාද්දී පෙනෙන්නේ කාවද

මැදිවියේ අයෙක් 
අරුණැල්ලට පෙර  ලොවට හොරෙන් ,  
එබෙද්දී  කැඩපතකට බිඳුණු 
 බ්ලේඩ් තලයකින් සූරා දමනට 
 දෙකොපුල් නිකට පුරා නැගී සුදු රැවුල් කොට  
දකීද ඔහු කුමක් නම් ?

පෙනේන්නේ ඔහුට 
තම පියාගේ හොල්මනද 
කාලයේ වැල්ලේ වැළලුනු ? 
නැතිනම් කොලුගැටයා ද 
ගැටවර 
සෙනෙහ කොළ මතකයක සිරවුණු 

නැතිනම් 
හෙවනැලි ද 
 දිගැරුණු 
හිතක අහුමුලු දිගේ
නැතිනම් 
ආත්මයේ කඩතොළු වල ම රැඳී 
සියලු බිය සංකා 
සම්ප්‍රයුක්තයම වෙද ?

බැල්ම හිරවුණු 
හකු පුඩු දිගේ  
වියපත්  රැවුල් කොට වලම 
අමතක වුනු 
පළමු සික්ඛා පදයම 
යථාවාදී අත්පොත් 

අයෙකුට පවා 
ඒවී දවසක් 

ගැහෙද්දීත්  හදවත 
මුහුණ දෙන්නට 
බුර බුරා නැගී බියෙන්ම 
දෑස් ඔසවා බලන්නට 
චායාව කැඩපතේ
දකින්නට 
කඳුලැල්ලක් 
විස්මිතව  

හීන නම් ජීවිතයක 
හිම මෙනි 
සිසිරයේ රැයක වැටි 
වසා මිහිතලම 
සඳ කැන් දහරින් දිලිසෙන 

ඒත් අරුනැල්ලේ  
දියවේමය 
හිම නම් 

ගෝඩන් මැතිව් තෝමස් සම්නර් හෙවත් ස්ටින්ග් කියන්නේ මගේ ප්‍රියතම  ගායකයෙක් . මුල් කළ ඔහු නිර්මාණවල ඇති පොප් සංගීතයෙන් මිදුනු , ඔහුගේ වියපත් හඬ , කාව්‍යමය පද වැල් මා හද වඩාත් ඇද බැඳ ගෙන .   

She loves someone else කියන්නේ මා ප්‍රියතම ගීයක් . 

පද පේලි සිංහලට පෙරලන්නට පටන් ගෙන ටිකක් දුර යද්දී නොදැනීම  ,පද මූට්ටු වෙලා මොකක්දෝ වෙන අර්ථයක් එන විදියට . අද පියවරුන්ගේ දිනය හින්දද මන්දා  .

විනාඩියක් දෙකක් අරන් මේ ගීතයත් අහන්න 




11 June 2017

ඉන්ද්‍රජාල අංකල්ගේ ඇස්බැන්දුම් සහ විස්මිත මායා

ඉන්ද්‍රපාල හිටියේ අපේ ගෙවල් පැත්තේ . රැකියාව කලේ නගර සභාවේද කොහේදෝ කියලයි මට මතක . ඒත්  ඔහු ප්‍රසිද්ධ වෙලා හිටියේ වෙනත් අයුරකින් . 

කෝට්ටේ පාර අද්දර තිබුණු ඔහු නිවසේ තාප්පයේ  පාරට පෙනෙන්න බෝඩ් ලෑල්ලක් ගහලා තිබුනා . ජටාවක් ඔලුවේ ඔතාගෙන , සයිස් දෙකක් විතර ලොකුවට කෝට් බෑයක් පොරවාගෙන , අතේ පරෙයියෙක් අල්ලාගෙන. යටින් පොල් අකුරෙන් ලියලා තිබ්බේ මෙහෙම 

" ඇස්බැන්දුම්,  විස්මිත මායා සහ ඉන්ද්‍රජාල , ද අමේසින් ඉන්ද්‍රපාල "

ඔහු විනෝදාංශයක් ලෙස, ඊටත් වැඩියෙන් අමතර ආදායම් මාර්ගයක් ලෙස,  කළේ පොඩි පොඩි උපන් දින උත්සව , සතුටු සාද වල මැජික් පෙන්නීම . අර ජටාව ඔලුවේ ඔතාගෙන , කෝට් බෑය ඇඳලා  , උරහිස් දෙකේ හැට්ට කටු දෙකකික් පොඩි සාලුවකුත් එල්ල ගන්නවා පිට දිගේ නිකන් සුපර් මෑන් වගේ . නිල්පාට සාලුවේ ඉර හඳ තාරුකා ඇඳලා තිබ්බා .

ආයේ ඉතින් අමුතුවෙන් කියන්න ඕනේ නෑනේ , කොල්ලෝ,  කුරුට්ටෝ සහ සෙස්සෝ සියල්ලෝම ඔහුව ඇමතුවේ ඉන්ද්‍රජාල අංකල්  නැත්නම් ඉන්ද්‍රජාල අයියා කියලා .

මැජික්  කිව්වට  ඉන්ද්‍රජාල අංකල්ගේ ප්‍රගුණ කරලා තිබුනේ  තොප්පි වලින් හාවෝ ගැනීම  , කෝට්  අතෙන් පරෙයියෝ මැවීම,  කටෙන් නොනවත්වා ලේන්සු එලියට ඇදීම වගේ සිල්ලර මැජික් සහ ඇස්බැන්දුම් විතරයි . ඉතින් බොහෝ විට මේ සෝ වල මවිත රසයට වඩා ජනිත උනේ හාස්‍ය රසය .

 ගෙදර කට්ටියටත් ඉන්ද්‍රපාල්ගේ මේ මැජික් විහිළුවක් වෙලා තිබ්බේ . ඉන්ද්‍රපාලගේ නැන්දම්මා උණත් ඔලොක්කුවට කිව්වේ "පුළුවන් නම් උඹේ ඔය මැජික් එකෙන් කාර් එකක් මවා ගනින් කෝ " කියලා. ( ඒ වෙලාවට ඉන්ද්‍රපාල හිතුවේ මිනිස්සු සදහටම අතුරුදහන්  කරන්න  පුළුවන් ඉන්ද්‍රජාල ක්‍රම ගැන .)

. ඒ ඔක්කොටම වඩා ජෝක් එකක් උනේ , ඉන්ද්‍රපාලගේ පොඩි එකා ලලන්ත . ඉන්දරේ යන සෝ වලට ලලාත් ගියා අතේ එල්ලිලා . ඉන්දරේ ගෙදර ඉන්ද්‍රජාල ප්‍රැක්ටිස් කරනවා බලාගෙන ඉන්න පොඩි එකා සෝ එකේදී කෑ ගහනවා . "අන්න අන්න පලේයියා කෝත්  එකේ "... "අන්න තාත්ති ආවා පිටිපස්සේ අන්ගගත්තා " ...
ඉන්ද්‍රජාල අංකල්  මාර අපහසු තාවයකට පත්වෙන්නේ ඒ වගේ වෙලාවකට . 
අර මොකක්ද එකා කනවා ඉවසුවට , අර මොකක්ද එක ඇනෙන එක ඉවසන්න බෑ  කිව්වනේ... මුළු ප්‍රේක්ෂ්කාගාරයම  හිනා වෙනවා ඔලොක්කුවට .

***
 එක සැරයක් කන්තෝරුවේ සල්ලි වගයක් මොකක්දෝ කරලා අන්තරස්දාන කරලා ඉන්ද්‍රජාල අංකල් ගේ සේවය අත්හිටෙව්වා . ඒත්  පස්සේ සාක්කිත් අතුරුදහන් වූ නිසා , දඬුවම් නැතුවම බේරුනා .

ඊට පස්සේ සතියෙම  දන්නා ප්‍රාදේශීය මාධ්‍යවේදියෙක් ගෙදරට ආරාධනා කරලා පොඩි සංග්‍රහයක් එහෙම කරලා ( මාධ්‍යවේදීන් අතර අල්ලසට හිස නමන කිසිවෙක් නැති නිසා මෙය අල්ලසක් ලෙස නොසලකන්න ) , ඉරිදා පත්තරේක පොඩි තීරුවක් ලියා ගත්තා .

ඊට සති කිහිපයකට පස්සේ  අර තාප්පේ බෝඩ් එක වෙනස් වුනා . 


" ලෝකේ හොඳම  ඇස්බැන්දුම්,  විස්මිත මායා සහ ඉන්ද්‍රජාල , ද අමේසින් ඉන්ද්‍රපාල "

***

ටික කාලෙකට ඉන්ද්‍රජාල බිස්නස් එක නැගල ගියා ,. ඒත් ඵල ඇති රුකට ඉරිසියාකාරයෝ බෝමයි . ආයෙත් මුදල් අක්‍රමිකතාවක් ගැන පැමිණිල්ලක් ඇවිත් රස්සාව නැති උනා .

දවසක හවසක සෙට් උන මිත්‍රයෙක් මේ වෙච්ච අකරතැබ්බේට හේතු ඵල

" ඔය බෝඩ් එකේ හරියට  ඝන පිහිටුවලා නෑ.  මෙහෙම වෙනස් කරන්න "

" ලොව පතළ , අන්තර්ජාතික ඇස්බැන්දුම්,  විස්මිත මායා සහ ඉන්ද්‍රජාල , ද අමේසින් ඉන්ද්‍රපාල"

බෝඩ් එක මාරු උනා . හැබැයි ඉතින මෙහෙම ඉන්ටෝනැසොනල් බෝඩ් ගහලා  අර සිල්ලර මැජික් බෑ නේ . ඉතින් ඉන්ද්‍රජාල අංකල්  අලුත් මායා ඉගෙන ගත්තා.  

***
ඔන්න සෝ එක පටන් ගත්තා.  දැන් කට්ටියම ඉඳගෙන ඉන්නවා මොකාටද එන්නේ කියලා බලන්න .

" මගේ මුල්ම මායාව  සඳහා, කවුරු හරි ඉදිරිපත් වෙන්න " ඉන්ද්‍රජාල අන්කල්, බංගලාව හන්දියේ සංවර්ධනේ විකුණන අජියා දිහා බලාගෙනම කිව්වා.

 අජියා වේදිකාවට ආවා . 

ආ ඔය අතේ මොකක්ද තියෙන්නේ ?"

"මේ සංවර්ධන ලොතරැයියක් "

"දැන් මේ පෙට්ටියේ ඉන්නේ මොකෙක්ද ?"

"අම්බෝ තඩි ගෙම්බෙක් "

"...අපේ තාත්තිගේ හාවාව , බව්වා  කෑවා .. හදිස්සියට ගෙම්බෙක් විතලයි හොයාගන්න පුළුවන් උනේ " ..ලලාගේ කොමෙන්ට්‍රිය පටන් ගත්තා .

"දැන් ඔය ස්වීප් එක මේ පෙට්ටියෙන් තියන්න. .. පර්ස් එකෙන් නෝට්ටුවක් ගන්න   "

අජියා රුපියල් සීයක් දික් කළා 

" චිකේ .. මේක ඉන්ටනැසනල් මායාවක් .. පන්සීයක් වත් ඕනේ අඩුම ගානේ  ...

අජියා පන්සීයේ කොලයක් දික් කළා .

"ඔන්න ඔය පන්සීයේ කොළෙත් හතරට නාවලා  පෙට්ටිය ඇතුලේම තියන්න  . .."

ඉන්ද්‍රජාල අංකල්  පෙට්ටිය වැහුවා . 

"ඔන්න දැන් හොඳට බලා ගන්න ..ආ අර කවුද අර දෙවැනි පේලියේ මැද ඉන්නේ අපේ අනුරයියාගේ පුතා නේද ...හලෝ කිව්වා .. අවධානය බිඳ ගන්න එපා ..ඔන්න "  ... ඊට පිටිපස්සේ පේළියක ඉඳන් අනුරයියත් ලාවට හිනා උනා 

ඉන්ද්‍රජාල අංකල් පෙට්ටිය වට තුනක් කැරකුවා .. පෙට්ටිය ඇරියා ...ඇතුලේ හිටපු ගෙම්බා නෑ ... ඌ පරෙයියෙක් වෙලා . 

"අජිත් ගන්න බලන්න  ස්වීප් එක "

"චික් මූ ඒ ටිකට ඒක  උඩ බෙට්ටක් දාලා "  අජියා අත ආපහු ගත්තා 

"අන්න අන්න ..සුපියල් පන්සීය තාත්ති සාක්කුවේ දා ගත්තා " ලලා කෑ ගහනවා  ඈත කොනකින් ඇහුනා 


පලි : 
විද්යානුකුල ක්‍රමය කියන්නේ පරීක්ෂණ නිරීක්ෂණ ඔස්සේ නිගමන වලට ඒමය .

විජ්ජානුකුල ක්‍රමය කියන්නේ පෙට්ටිය වට තුනක් කරකවා පියන ඇරිය විට ඇතුලේ සිටි ගෙම්බා , පරෙයියෙක්  වීමය 

08 June 2017

සෝමේ අයියාගේ ගංවතුරු ආධාර බත් එක සහ කොම්පැනි ගංවතුරු ආධාර වතුර බෝතලේ

මේ , හෙට උදේට වැඩිපුර බත් එකක් බැඳලා දෙනවා .. ඉස්ටෙටමේ ගංවතුර ආධාර එකතු කරනවලු " කියලා සෝමේ අයියා කියපු නිසාම සොමි අක්කා උදේ පාන්දරම නැගිටලා බත් පාර්සල දෙකක් බැන්දා .

"මේ දැන්  මතක තියාගන්නවා , මේ පින්තුරේ තියෙන කොලෙන් ඔතලා තියෙන්නේ ආධාර බත් එක අනිත් එක ඔයාගේ .. ඒකට මාළු කෑල්ල  බෙදුවා . ගංවතුරු කාරයින්ට එලවුලුයි බතුයි ඇතිනේ " සොමි අක්කා සිලි මල්ලක බත් ගෙඩි දෙකම දැම්මා.

" එහෙම හොඳද ? " සෝමේ අයියා කෝච්චියේ එනකන් හිතුවේ ඒ ගැන .


කෝච්චියේ සීට් එකට හේත්තුවෙලා , පෝන් එකේ පේස් බුක්එකේ පහලට  යනකොට,  මෙන්න දැන්වීමක්

එක්තරා බෝතල් වතුර සමාගමකින් අඩු මුදලට ගංවතුර ආධාර සඳහා වතුර බෝතල් දෙනවලු .

කොම්පැනි නේ. මාසේ පඩියෙන්, තුන් වේල ගැට ගහන අපි වගේ නෙමෙයිනේ. වියදම වත් පියවගන්න ඕනෙනේ.

ඒත් එක්කම , රුපියල් දහය ගානේ , අඹ ගෙඩි  සීයක් විකුණු විට ලැබෙන ලාබයද , රුපියල් දෙක ගණනේ අඹ ගෙඩි දාහක් විකුණු විට ලැබෙන ලාබයද වැඩි , පොඩි ඒකිගේ ගණන් පොතේ පැනයක් සෝමේ අයියාට මතක් උනා

04 June 2017

අකලමනා ආපදා කතා


තෙවරප්පෙරුමගේ  සිල්ලර පොලිටිකල් භූමිකාව 
තෙවරප්පෙරුම වතුරේ බැහැගෙන , ආච්චිලාව , පොඩි එවුන්ව උස්සගෙන ගිය එකෙයි , නාමල් බෝට්ටුවක් තල්ලු කර ගෙන සෙල්ෆි (වගේ ඒවා ) ගත්ත එකෙයි වෙනසක් තියෙනවා . සන්ජන් කරන පොලිටිකල් ස්ටාර් රියලැටි  වැඩ සටහනෙයි , තෙවරක්පෙරුමගේ වික්‍රමයන්ගෙයි වෙනසක් තියෙනවා .

ඒ  තමයි මුලින්ම  ටයිමින් එක . දෙවැන්න සද්බාවය .

මුලින්ම දෙවැන්න. ඈත ඉඳන්,  මගේ කියවීම නම්, තෙවරක්පෙරුමගේ ක්‍රියාව සෑහෙන දුරකට ජෙනුඉන් කියලයි . කොටින්ම සිරසේ ඉන්ටවිව් එකකට ඇවිල්ලා , නිවේදකයා ඔලුවට දාන්න හදන ඔටුන්න ( හෝ තොප්පිය ) ඔහු පැත්තකින් තියෙනවා . වෙලාවක " අනේ මහත්තයෝ මට මේ කතාව කියන්න විනාඩි පහක් දෙන්න " ඔහු බැගෑපත් වෙනවා . කපටියෙක් නොවී දේශපාලකයෙක් වෙන්න බෑ . ඒක  හරි ..ඒත් .. පාර්ලිමේන්තුවේ ලොකු විවාද කරන්න බැරි උනාට ,  පොලිටිකල් ටෝක් ෂෝ වල ගල් පැලෙන තර්ක නොකලට , ජෙන්ටල්මෑන් පොලිටිෂන් කෙනෙක් නොවුනට , ඒ සිල්ලර දේශපාලනය ඇතුලේ  යමක් තියෙනවා කියලා මට හිතෙනවා .

ටයිමින් .. මිනිහෙකුට කෘතීම ශ්වසනය දෙන්න ඕනේ මැරෙන්න කලින් . අන්න ඒ වගේ තමයි . වතුරට යට වෙලා ඉන්න මිනිස්සු ලඟට බෝට්ටුවක් අරන් එන මිනිහෙක් , ඒ වෙලාවේ වීරයෙක් . ගැලවුම් කරුවෙක් . කොන්ෆරන්ස් රූම්  වල සැලසුම් කරන , සම්බන්ධීකරණය කරන ආපදා කළමනාකරණ මෙහෙයුම් වගේම  ඕන ද ග්‍රවුන්ඩ් දුක බෙදා ගැනීමත් අවශ්‍යයි .
අන්න ඒකයි තෙවරප්පෙරුම  භූමිකාව. විය යුතුව තිබුනේ (හෝ විය යුත්තේ ) ඔහුව ආපදා කළමනාකරණ යාන්ත්‍රනය තුලට අනුගත කර ගැනීමයි 
ඒත් අනෙක් අතට , දවස් දෙකකට පස්සේ නැෂනල් සූට්  එක උඩින් ලයිෆ් ජැකට් එකක් දා ගෙන ගංවතුරු බෝට්ටු සවාරි යන එකා, කෙහෙල් ගෙඩි තුනක් ඔතලා , පොටෝ ස්ටිකර් එකක් ගහලා බෙදන එකා ජෝක් එකක් . ඒ වගේම උන් කරන්නේ අර මිනිස්සුන්ට අපහාසයක් .

***

ආපදා අකලමනා 
සුනාමියෙන් පස්සේ ඇති කරපු ආපදාව කළමනාකරණ අමත්‍යාංශය තාම හරියට කළමනාකරණය කරගන්න බැරි හැඩකි . ආපදා කලමනාකරණය කියන්නේ  ආපදාවේ දිග පළල හේතුව සෙවීම නොවේ . මතු ආපදා වැළකීමත් ඇතිවන ආපදා වලට මුහුණ දීමත් .

ආපදා කළමනාකරණ ඇමති තුමා , මෙක්සිකෝවේ ඉඳලා ඇවිත් චන්ඩි ටෝක් දීලා ආපදාවේ  සම්පූර්ණ වගකීම ගත යුත්තේ වැස්ස වලාහක දෙවියන් සහ මිනිස්සුන්ගේ කරුමේට පැවරුවේය .  එතකොට ආපදාවෙන් පසු සහන සේවා ? ඒවා පුළු පුළුවන් විදියට මිනිසුන්ගේ පරිත්යාගයන්ගෙන් සිදුවෙන බවත් , මීට අමතරව චීනෙන් සහ ඉන්දියාවෙන් නැව් එන බවත් කීවේය . මම බලන් හිටියේ ඔහු  මාද්‍ය හමුවෙන් නැගිටින තෙක්ය . ඒ ඔහු සරමක් කලිසමක් ඇඳ  සිටින්නේද කියා බලා ගැනීමටය . 

මිනිස්සුන්ට උදේට වැඩට එනකොට වැඩිපුර කෑම  එකක් බැඳන් එන්න කියන්න නම් මේ අමත්‍යාංශය මොකකටද . කොළඹ හෝටල් වල කුස්සි ටික බත් පාර්සල ටිකක් උයාගන්න සම්බන්ධීකරණය කරන්නට බැරි නම්  , ධීවර බෝට්ටු ටික , රට ඇතුලේ ගංවතුරු බේරාගැනීම් වලට සම්බන්ධීකරණය කර ගන්න බැරි නම් මේ අමත්‍යාංශය කුමකටද ? 

අමාත්‍යංශයක පිරිවැය සුළුපටු නොවේ. ඉදින් සල්ලි ගෙවා ගෙවා මෙවැනි ඒවා පවත්වා ගෙන යනවට වඩා එක අතකින් මෙය  පුද්ගලීකරණය කරන්නේ වත් නම් හොඳයි දෝ සිතේ .

***
වතුර බැහැලා ගියාට 

"වතුර බැහැලා ගියාට මිනිස්සුන්ගේ දුක එහෙම බැහැලා යන්නේ නෑ මහත්තයෝ"

ඇල්බට් ගොයියා @ කඩමණ්ඩිය , පුස්ලෝඩා එකක් කඩලා කටට දා ගන්න ගමන් .

මේ වගේ ආපදාවකදී ජීවිත නැතිවීම ඛේදවාචකයක් තමයි . ඒ දුක ජීවත් වෙන අයට .

ඒ විතරක් නෙමෙයි, ජීවිත කාලයක් තිස්සේ එකතු කරගත්ත  දේ එක පාරට ගහගෙන ගියහම ඇතිවන චිත්ත බිඳීම සමහර විට ඊටත් වඩා. එක එක ආර්ථික මට්ටම වල හිටියත් අපි ඔක්කොම අමාරුවෙන් ජීවත් වෙන මිනිස්සු . ගොඩේ තරම වෙනස් වුනත් , ඒ තියෙන්නේ ජීවිත කාලයක් පුරා ගොඩ නගපු දේවල් . භෞතික දේවල් විතරක් නෙමෙයි.
මේවා වතුරට ගහගෙන ගියහම , ඇතිවන ඉච්චා බංගත්වය තමයි , මිනිස්සුන්ගේ කකුල් බර කරලා , කොඳු කඩා දාලා ආයේ නැගිටින්න අමාරු කරන්නේ .

අපි ඔක්කොම මමත්ව කේන්ද්‍ර මිනිස්සු . ඉතින් වටේ ලෝකේ කඩා වැටුනත් , ආත්ම ගරුත්වය කෙලින් තියෙනකන් , ආයෙත් නැගිටිනවා .    (අසු තුනේ ජූලි  කලබල වලට අහුවෙලා ගෙවල් දොරවල් අත ඇරලා දාලා , ඉස්කෝලෙක අනාථ කඳවුරක හිරවෙච්ච ෂන්මුගන් අන්කල් පස්සේ දවසක කිව්වේ , ඔහු මාස ගණනක් ඇඬුවේ ,  සබ්බ සකල මනාව ගින්නෙන් අළු උණු එකටවත් , පොඩි  මල්ලි ශංකර් ව පෙති පෙති ගහලා දාපු එකටත් වඩා , ඔහුට හිඟන්නෙක් වගේ මිනිස්සුන්ට අතපාන්න වෙච්ච එකටයි කියලයි . ) 

හැම මිනිහෙක්ගේම ආත්ම ගරුත්වය තමයි ජීවිතේ නැගිටින්න ට්‍රැක්ෂන් එක දෙන්නේ. මෙවැනි ආපදාවකදී භෞතික පිළිසරණ වගේම,  කරන්න ඕනේ , හැකි ඉක්මනින් මේ ආත්ම ගරුත්වය පිකප් කරන්න උදව් කරන එක  . 

අන්න එකටයි ආණ්ඩුවක් ඕනේ . ආපදා කලමනා කරන අමාත්‍යාංශයක් ඕනේ .

17 May 2017

පස්චාත් වෙසක් කතා

 

බුදු හිරගෙය 
අට පට්ටම් රාමුවේ
සව් කොළ
පාට පාට
බිත්ති මැද
හිරවෙලා
අපේ බුදුන්

***
සම්බාහන දන්සැල සහ අනෙක් දන්සැල 
රිචාජ් , ඩේටා , හයර් දන්සැල් අතරේ
8 වැනි පටුමගේ
ලීනා මැඩම්
දානපතිනියගේ
නොමසුරු පරිත්යාගයෙන්
පවත්වන
මහා සම්බාහන දන්සැල ලු
හෙඩ් මසාජ් , ලෙග් මසාජ්
ඉන තෙක්
බොඩි මසාජ් ලු

ඊට වඩා බෑ නේ
දන්සල් නේ
වෙසක් නේ

ඒ වුනාට
සෙනග නෑලු
යාලු

9 වෙනි පටුමගේ
පොට් එකේ
රෝසා අක්කත්
දාළලු දන්සැලක්
කෙල්ලෝ ටිකත් එක්ක
වෙන්නට
නො සෙකන්ඩ් 


***
ප්රී වෙ ඕ පු

කලු කොඩියත්
ලෑස්ති කරන් 
හිටියත් අපි මග බලන්
මෝඩි 
හොර ගෙඩියා වගේ
නැගලා තඩි ප්ලේන් එකේ
ආවේ පෝයට පස්සේ

දැන් ඉතින් වෙන කුමක් කරන්නද

කලුකොඩි හැම රෝල් කරන්
අනේ අපිට ප්රීති වෙසක්


14 May 2017

The old Ballerina's home remedy, අපේ අම්මාගේ මුදූ වැලි සාත්තුව සහ තවත් දහසක් කතා


Despite
the rationale queries
well intent; yet
the scepticism 
hackles 
yet 
the maternal pride 
makes up for it 

her son
a grown man now
..almost

And the doctor's
thirty six seconds’  of 
(she'd learnt to count
one missipi two)
wisdom,
the last of the colloquy 
conventional
but expensive

Hoary ballerina 
with  crooked toes
take the long lurch  
to the shore
for a handful of sand
surf's forgotten
yet
 still tear soaked

First 
heat up the sand 
over a slow flame
pack 
small parcels
of 
memories
(amnesia flickers first )
enfold in frayed silk 
whiffing of moth balls
to  massage her
inflamed joints


..It helps


***



වටකුරු තර්ක
යථාවාදී මුත්
පීඩාකාරීය
කල් ඉකුත් වත්
(පොඩි පුතා , යමක් දත්
මහා මිනිහෙක් නේ දැන් )

චැනල් කඩේ දොස්තර
ලියු තුණ්ඩුවේ
පිටින් ගන්න පෙති ජාතිම තුනක්
(හරියටම විනාඩි දෙකයි බැලුවේ
එක ලෙඩෙක් )

පා අද්ද අද්දා
ඕ  ගාටන්නී
ගන්නට මිටක් වැලි
කදුළු මිරිකා
රළටත් අමතක වූ
වෙරළ  කොනකට

තැටියේ රත්කර
මද ගින්නේ
බැඳ මතක පොට්ටනි
පොඩියට
තවන්නට
හන්දි පත්
දිවියේ බරටම
ඉදිමුණු

(පුංචි වගේ ගුණයක්
තියෙනවා )


පලි
සමහර නිර්මාණ වල , නිමිත්ත,  කතාව තරමටම රසවත්. නිර්මාණය අතින් අත යද්දී, පවතිද්දී, නිමිති කතාව කාලයට දියවෙලා යනවා.

අපේ අම්මා, කාලයක ඉඳන් දණහිසක වේදනාවකින් පෙළෙනවා.  දේශීය බටහිර දෙවෙදකමම මාරුවෙන් මාරුවට වගේ කරනවා. වෛද්‍ය නිගමනය ආතරයිටිස්වල මුල් ලක්ෂණ . ගිලින්න පෙති ගොඩක්, කල් ගතවෙන ප්‍රතිකර්ම .
මාසිකව දොස්ත්ර හමුවීම දැන් චාරිත්‍රයක් වගේ වෙලා .. ඒ ඔක්කොම මැද  ජීවිතේ  ගොඩක් දේ වගේම මේ වේදනාවත් ඈ  උහුලා ගෙන ඉන්නවා.

දවසක් ඈ  සමග කතා කරද්දී, තෙසක් රියක රියදුරෙක් ඇයට රියදුරෙක් ඈට  කියූ ගොඩ වෙදකමක් ගැන මට කියනවා.

"...පරණ වෙද පුස්කොල පොතක තිබිලා වෙද  මහත්තයෙක් කිව්වේ .. මුහුදේ වැලි,  තැටියක රත් කරලා, පොට්ටනි බැඳලා, ඉර අවරට ගියාට පස්සේ  තවන්න නෝනා. මාස තුනෙන් හොඳ වෙනවා. මෙන්න මගේ පෝන්  නොම්බරේ, නෝනට හොඳ උනාම මට කෝල් එකක් දීලා කියන්න ."

ඔහුම රිය පාරේ අයිනේ නවත්තලා ගිහින් වැලි ටිකක් සිලි මල්ලකට ගෙනත් දෙනවා. (අපි හරි වෙනස් !!)

" මම ආමි එකේ හිටියේ නෝනා, ජොනි බට්ටෙක් පෑගුනා " දණෙන්  පහල කෘතීම පාදය පෙන්නලා ඔහු කියනවා

මගේ යථාවාදී විද්‍යාත්මක තර්ක ඈ  නිසොල්මනේ  අහගෙන ඉන්නවා.  දුරකතනයෙන් එහා පැත්තේ, ඈ , මුවඟට නැගෙන (ආඩම්බරය මුසු ) හිනාවක් පහළට  අකුලා ගන්නවා, මට මැවිලා පෙනෙනවා

එදාත් හවසට ගෑස් ලිප උඩ , රොටි තැටියේ, මුහුදු වැලි රත්වෙනවා.

පපලි: මෙහි මාතෘකාවේ දහසක් කතා කියා ලියුවේ ඇයි කියා ඔබට තේරෙනු ඇතැයි  සිතමි

03 May 2017

පස්චාත් මැයි දින කතා

කතාව 1 
හැම දාම තැඹිලි කරත්තයක් හංදියේ තියාගෙන ,  වෙළඳාම් කරන ප්‍රාග්ධන හිමියෙක් ඊයේ මැයි දින පෙළපාලියේ ගියානේ .
ශ්‍රමය විකුනලාම යැපෙන කෝල් සෙන්ටර් කෙල්ලෙක් ෆුඩ් කෝට් එකක , ලම්ප්රයි එකක් දිග අරින ගමන් , ඒක දැක්කේ ටීවී එකේනේ .
ප්‍රාග්ධන හිමියෝ නේ 
කම්කරුවොනේ 
ටීවී නේ 


කතාව 2
හවස් වෙන්න වෙන්න පෙළපාලියේ ගිය එවුන් ගේ හෙවනැල්ල තාර පාර දිගේ දිගට ඇදුනා නේ .
අඩි ඩාස් ජෝගින් සපත්තු දා  ගත්ත නායකයෝ , ඒ හෙවනැල්ලට මුවා වෙලා නේ ගිරිය පුප්පන් කෑ  ගැහුවනේ 
හෙවනැලි නේ 
නායකයෝ නේ 
අඩි ඩාස් නේ 


කතාව 3 
ජේ ආර් මැයි දිනේට , නිතින් මුකේෂ් ගෙනල්ලා බජව් දැම්මනේ 
ඒ එස්පී ලියනගේ , උගේ පැක්ටේරියේ මැයි දිනේ ඌම ඔගනයිස් කරලා 
ඌම ඉස්ටේජ් එකට නැගලා 
ඌම කතාව පැවැත්තුවා නේ 
කැතයිනේ 
ජේ ආර් නේ 
ඒ එස් පී ලියනගේ නේ 
කැත කියනකොටනේ 


කතාව 4
කාගේ කාගේත් අරක්කු වැඩ කරේ  මහපාරෙනේ 
නිකන් හම්බුවුන ප්‍රයිඩ් රයිස් හවස් වෙනකොට ඔක්කාරෙට ආවනේ 
 අනේ සතෙන් සතේ එකතු කරලා ගෙවපු බස් එකේ , කොළඹ ආපු චන්දසේන 
කමිසේත් ඔලුවේ ඔතාගෙන 
පාරේ වැනි වැනි යන ගමන් නේ 
පාක් කරලා තිබ්බ ඇල්ටෝ බට්ටෙක්  අත ගෑ වනේ 
චන්දසේනනේ 
ෆ්‍රී ගල් නේ 
ඇල්ටෝනේ 



29 April 2017

ටෙනිසේනගේ ගැසට් පීස් එක

මචං , අර ටෙනිසේන ගේ ගැසට් ජෝක්  එක අහලා තියෙනවද 

මොන ටෙනිසේනද ?

අර බන්දු ටෙනිසේන ඩබලගේ ටෙනිසේන 

ටෙනිසේන  නෙමෙයි ඒ  ටෙනිසන් 

හරි හරි , අහලා තියෙනවද 

මොන ගැසට් එකද මචං 

ගැසට් පීස් මචං  ඉස්සර සිංදු රෙකෝඩ් කලේ 

යකෝ ඒ ගැසට් නෙමෙයි කැසට් පීස් .. මොකක්ද ඉතින් ඔය කතාව 

ඔන්න පොර ඉස්සර කැසට් එකක් ගැහුවලු .  ඌට එහෙම කියලා සින්දු කියන්න හැකියාවක් නෑලු.  ඒත්  කැසට් එක විකිනේනවලු . පොරටම පුදුමයිලු . ඉතින් පොඩි සමීක්ෂණයක් කලාලු  කවුද ගන්නේ කියලා බලන්න .

ඉතින්?

උඹට මතකද ඉස්සර ඔය කැසට් පීස් , පොඩි එවුන්ට අහු උනාම .. අර පටිය ඇදලා දානවා . .. ඇදලා අරන් සරුංගල් අරින්න ගන්නවා .. රෙදි වැලවල් බඳිනවා 

ඔව් ඔව් ඉස්සර ඔය කැසට් මැදදී ඇඹරිලා .. මහද නමැති වන බඹරා ලංවී.. කියනකොටම හිරවුණා .. ඇඩ්ඩින් මාමා නැගිට්ටේ "අම්මට " කියාගෙන 

ඔව් ඔව් ඔහොම ඇබැද්දි වුනානේ .. ඉතින් මිනිස්සු ඔය ජෝතිගේ මිල්ටන් ගේ පීස් ආරක්සා කොරගන්න , පොඩි එවුන්ට සෙල්ලම් කරන්න දෙන්න තමයි ටෙනිගේ කැසට් පීස් එක සල්ලි දීලා අරන් තියෙන්නේ 

මේ මචං , උඹේ ටෙනිසේනගේ කැසට් විතරක් නෙමෙයි  වෙන වෙන සේනලා ගේ ගැසටුත් ඔය වගේම තමා  . 

17 April 2017

මේ කුණු කන්ද බැලුවා හොරැහින් මදෙස



                                      (මෙය උපුටා ගත්තේ මෙතනින් https://www.facebook.com/madhushaka.sahanjeewa)


හුන් උන් අතැර නුඹ පත්කර ගත් දවස 
මේ කුණු කන්ද බැලුවා හිඳ ගම සිරස 
කාලය ගතව දිව්රුම් අමතකවූ සඳ 
මේ මහා කන්ද බැලුවා හොරැහින් මදෙස

හමන හුළඟ දුගඳම  හැම අත පතුරයි 
නෙක සැලසුම්, දිවුරුම්, ආපසු ඇකිලෙයි 
කුණු ලොරි ගණන් තව තව කන්දට එක්වෙයි 
නොකියූ රහස් කුණු ගොඩ අස්සෙම සැඟවෙයි 

මනාප යදින්නට ඔබ ආ එදවස 
මේ කුණු කන්ද සිනහා උනේ ඔච්චමට 
මරණාධාර දෙන්න ඔබ මෙහි ආ අද දවස 
මේ කුණු කන්ද බැලුවා හොරැහින් මදෙස 



පලි 
මේ ප්‍රශ්නය ගැන මම දන්නේ එහෙන් මෙහෙන් ඇහෙන කියවෙන දෙයම පමණි . 
ව්‍යසනය මා සිතේ කම්පනයක් නම් ඇති කර ඇත . කුණු කන්දකට යටවී මැරෙන්නට වෙන රටක් ..??? අනෙක් අතට අපද්‍රව්‍ය කළමනාකරණය ගැන ද මා  දන්නේ බොහෝ අල්ප වශයෙනි . නමුත් මට මේ ගැන කියවෙන නොකියවෙන දේ අතරේ නැගෙන්නේ ප්‍රශ්න පමණකි . 

සමහර අච්චු පොත් වල , පාඩමට පෙර ප්‍රශ්න කිහිපයක් දක්වා සිටින්නේ , පාඩම කියවන අතරේ ඒ ගැන සිතන්නට බල කරන්නය .

1. මුලින්ම , වියත් මග කට්ටිය කියන ඔය සැලැස්ම  මහඟු නම් . අවුරුදු 20ක් ආණ්ඩු කරලා ඕක ක්‍රියාත්මක නොකළේ මන්ද? ප්‍රමුඛතා ලයිස්තුවේ , දියත උයන , ඉන්ඩිපෙන්ඩන්ස් ආකේඩ් එකට, සුරියවැව පිට්ටනියට පස්සෙද  මේ ප්‍රශ්නය පෙළ ගැහුනේ . 

2. මේ කුණු විකුණා ගෙන , ඉහ ගෙන කෑ  , හැම පැත්තේම හොරි කඩ දේශපාලඥයෝ කෝ 

3. හැම ප්‍රශ්නයක්ම විසඳන්න ඕනේ ජනාධිපති, අගමැති නම් පළාතේ මන්ත්‍රී ලා කුමටද . අපේ බදු මුදලින් උන් නඩත්තු කළ  යුතුද . 

4.උන් පන්නා දමන්නට චන්දයක් එනකන්ම සිටිය යුතුද . 

5. සයිටම් ප්‍රශ්නයට රෙද්ද උස්සා ගත්  සිවිල් සමාජ නඩ  (පක්ෂ විපක්ෂ දෙකම ) කෝ 
6. දැක්කේ නැති නිසා අහන්නේ , ඇත්තටම ඒකාබද්ධ විපක්සෙ උන් , ජවිපෙ උනත් කෝ ?
7.  මේ කුණු ගොඩ තියෙන්නේ ඉතා වටිනා ලොකේෂන් එකක නොවේද . මේ කුණු ගොඩ මෙසේ තිබීම , එය ඉවත් කිරීමට වඩා  වාසිද? ඒ කාටද 
8. මේ කුණු ගොඩ අස්සේ සැඟවුණු , කොමිස් කුට්ටි ,  ඩීල්  තිබේද 
9. ඇත්තටම රටේ නායකයා කෝ ?
10. අපදාවක් සිදුවූ පසු මරණාධාර දෙන්න නම් ආණ්ඩුවක් අවැසිද ? එයට නම්  මරණාධාර සංගමයක් ප්‍රමාණවත් නොවේද ?

07 April 2017

මැණිකේ මම ආයේ ගෙදර එනවා

මෙන්න මේ පැයේ  ජනප්‍රියම ගීතය ... සාදර අනුග්‍රහය කොළ නිල් පැකට්ටුවේ  යහපාලන පෆ් ... බිස්කට් දෙකට මැදිවෙච්ච , ක්‍රීම් බිංදුව  මිරිකෙච්ච ... යහ පාලන පෆ් 

පපර පපර පප  පා ,පපර පපර පප  පා 

මැණිකේ මම ආයේ ගෙදර එනවා 
මට බේල්  හම්බු වෙනවා //

කොච්චර මැතිකම් දැරුවත් , කළකම් දවසක පලදෙනවා 
කනකොට සනීප උනාට කුම්බලා අජී රණේ වෙනවා 
පායන කාළේ ආවම තණ කොළ ගහත් ගහක් වෙනවා 
ට්‍රෙන්ඩ් එකට දැන් හැම එකාම දැන් වැලිකඩ ගොස් එනවා 
නැතිනම් කොන් වෙනවා 


ස්ටේජ් එකට නැගිලා , අඬලා සෙල්පි ගසාලා 
මාංචු කේක් කපාලා , ඩලස්ලා ගම්මන්පිලලා 
මාස තුනක් වෙන්නත් ඇවිල්ලා , මුන්ට දැන් මං අමතක වීලා  
බලද්දී තනිව හිතාලා , ඇත තනියම මට කෙලවීලා 

මැණිකේ මට මේවා මතක් වෙනවා 
මට හරි කේන්ති යනවා 
මැණිකේ මම ආයේ ගෙදර එනවා 
මට බේල්  හම්බු වෙනවා

නොකා නොබී ඉස්පිරිතාලේ මා කළ මාරාන්තික උපවාසේ 
තැඹිලි පැනින් මා දෙතොල් තෙමන්නට එදා වගේ ඔබ නෑ ආවේ 
කවර්  කරන්නට , පුවත් මවන්නට දෙයක් අවස්ස වූ මේ මොහොතේ 
එදා මෙන් අදත් , මොනවා කීවත් , රනිල් තමයි පිහිටට ආවේ 

මැණිකේ මම ආයේ ගෙදර එනවා 
මට බේල්  හම්බු වෙනවා

02 April 2017

යක්කුන්ටත් කුක්කු පෙව්වේ...... කෙලින් හිටවලා

කඩ පේලියේ කොනේම , බෝඩ් ලෑල්ල ඊස්ට්මන් වර්ණයෙන් . කිව්ව හැටියට මෙතන තමයි තැන . ... ඇඩ්ඩින් ඇඩ්වටයිසින් ..ඔය තියෙන්නේ බෝඩ් එකේ ගහලා 

" ආ එන්න ඇතුළට , කාවද බැලුවේ "

" මිස්ට ඇඩ්ඩින් ..??"

" ඔව් ඔව් මම තමයි , මොනවද කරගන්න ඕනේ ?"

මම මේ දැන්වීමක් හදා ගන්න කියලා 

ඔව් අපි ඒවා තමයි කරන්නේ .. ප්‍රින්ට් මීඩියාද , රේඩියෝද , ටීවී විසුවල් ද 

ටීවී එකේ පෙන්නන්න තමයි 

හරි .. මොකක්ද ප්‍රෝඩක්ට් එක 

අපි මේ අලුත් කිරි පිටි ජාතියක් වෙළඳ පොලට දාන්න කියලා .

කිරි පිටි නම් ඉතින් විකුනන්න ඉතින් එක්කෝ ළමයි පෙන්නන්න වෙනවා නැත්නම් අම්මලා පෙන්නන්න වෙනවා .

ඇත්තටම මම අහන්න හිටියේ ඇයි මේ එළදෙනුන්ගේ කිරි එළදෙන පෙන්නලා විකුනන්න බැරි කියලා 

ගොන් ප්‍රශ්න අහන්න එපා
එහෙම නෙමෙයි, හැම කිරි ජාතියක්ම විකුනන්නේ අම්මලා , ළමයි නැත්නම් , නැන්දම්මලා පෙන්නලානේ .. අපිට ඕනේ අලුත් කොන්සේප්ට් එකක් ..


ඉතින්   සේක්සුඇලිටි , දුක කියන්නේ තාමත් හොඳට විකිණෙන  කොන්සේප්ට් නේ 

ඊට වඩා විකිණෙන කොන්සේප්ට් එකක් නැද්ද 

ඔහේගේ වෙලාව හොඳයි .. මං ගාව තියෙනවා එළකිරි කොන්සේප්ට් එකක් , බ්‍රෑන්ඩ් නිව් . .. ඔන්න ඇස් දෙක වහ ගෙන හිතෙන මවා ගන්න ... 

මහා දුක්මුසු , ජාතික සෝක දිනවලට රේඩියෝ එකේ යන , සිතාර්  මියුසික් එකක් එක්ක ඔන්න විසුවල් එක පටන් ගන්නකොටම පොඩි එකෙක් ඉන්නවා ලෙඩ ඇඳක . ... අම්මලා ආච්චිලා පොඩි එකාගේ ඇඳ වටේ... අම්මා  බිස්කට් එකක් කවන්න හදනවා , පොඩි එකා කන්නේ නෑ , ඔලුව අනෙක් පැත්තට හරවා ගන්නවා ..ආච්චි ඔරේන්ජ් ජූස් එකක් ගේනවා . කොල්ලා බිත්තිය  පැත්තට හැරෙනවා  .. කොල්ලාගේ අප්පච්චි ඉන්නවා ඈතට වෙන්න බෙල්ලේ තුවායක් පටලාගෙන .. එක පාරටම කැමරාව බිත්තියට යොමුවෙනවා . බිත්තියේ නිකන් පොඩි එකෙක්ගේ අකුරු වලින් ඇඳපු  බෝඩ් එකකට ෆ්‍රේම් එක යනවා " මහා මාරාන්තික වගේ උපවාසය " .. වටේ මිනිස්සු කතා කරන සද්දේ පොඩ්ඩක් ලාවට ඇහෙනවා 

"මොකුත්ම කන්නේ නෑ  කියන්නේ ... ඔහොම ගියොත් කොල්ලා මැරෙයිද ..." මිනිස්සු කතා කරනවා ඇහෙනවා නිකන් ලාවට වගේ හොඳේ 

අනේ මන්දා ඕක ගැලපෙයිද කියලා , මේ කිරි විකුනන්න

ඔහොම ඉන්නවකෝ  කලබල නොවී ..ඇස්  දෙක වහගන්නවා කෝ තව ටිකක් .. ඔන්න එකපාරටම හේවිසි  සද්දයක් එනවා  . එක පාරටම අර පිරිස මැද්දෙන් හාමුදුරු කෙනෙක් එනවා කිරි වීදුරුවක් අරගෙන . .. පොඩි එකා නැගිටලා බොනවා .. අම්මයි ආච්චියි හාමුදුරුවන්ව බදා ගන්නවා 

ලොක්කා මේ ..ඕක හරියන්නේ නෑ ..හාමුදුරුවෝ බදා ගන්න ..පිස්සුද ඕයි... 

හරි එහෙනම් ඒ කෑල්ල කපමු ..හැබැයි ඉතින් ආච්චිලා අම්මලා හාමුදුරුවෝ බදාගෙන තමයි ගොඩක් තැන්  වල ඉන්නේ .. කමක් නෑ ඔහේගේ කැමැත්තක්, ඔහෙනේ කස්ටමර්  ..ඊට පස්සේ ඊළඟ විසුවල් එක කිරිවීදුරුවක් , බැක් ග්‍රවුන්ඩ් එකේ ලෙලදෙන සිංහ කොඩියක් .. සිංදුවත් එක්කම ටැග් ලයින් එකක් ලියවෙනවා 

අපි යක්කුන්ටත් කුක්කු පෙව්වේ 
කෙලින් හිටවලා 
මල්ලි , කෙලින් හිටවලා  

..  කොහොමද ?

මේ මම දැන් ඇස් දෙක අරින්නද ?



පලි : හාමුදුරු කෙනෙක් කිරිපොවා උපවාසය නවත්වයි... එහෙමයි පත්තරේ තිබ්බේ . මේක තල කීපයකින්ම කිරිමිනෙල් කේස් එකකි . මා මිතුරෙක් මේ ගැන කිව්වේ වාහන අවභාවිතා කළ එකා , හාමුදුරුවෝත් අවභාවිතා  කරලා කියලාය . 

 අයෙක් කීවේ බුද්ධාගම දැන් දේශපාලකයින්ගේ , ධනවත් මිනිසුන්ගේ ආයුධයක් වෙලා කියලාය. ඒ කතාවේ ඇත්තක්  නැත්තේම නැත . නමුත් බුද්ධාගම හැම දාම ධනවත් මිනිසුන්ගේ ආගමක්ව තිබුනා නොවේදෝ කියා විටෙක සිතේ   . අනේපිඬු සිටු ගේ සිට ටයිගර් වුඩ්ස් දක්වා බිල්ගේට්ස් දක්වා , ධනවාදයේ කෙළට ගිය අය,   හිතට සැනසුම හෙවත් හයි එකක් ලබාගැනීමට ඉන් පසු ලංකර ගන්නේ නිරාමිස බුද්ධාගමයි. තම ධනය රැස් කිරීමේදී කළ  පව් සෝදා ගැනීමට වතුරට දිය කරන්නේ බුද්ධාගමයි . එක අතකින් බිල් ගේට්ස්ට එය වැරදි නැත්නම් , වීරවංශට එය වැරදි වන්නේ කෙසේදැයි කියාද සිතේ .

26 March 2017

කාලයාගේ පොටෝ ගැහීම








මගේ තියෙන පැරණිම චායාරූපය, මාස හතක්  අටක් විතර වයස බිලිඳු මා වඩා ගෙන , අප්පච්චි සිටිනා චායාරූපයක්. ඒ පින්තූරේ මම ඉන්නේ සිනා වෙලා උනාට , සැබෑ ජීවිතයේ බොහෝ විට මුහුණේ සිනහවක් තිබුණු අප්පච්චි, ඉන්නේ කැමරාවට ඔරවාගෙන . 
ඊට පස්සේ පැරණිම පින්තුරේ නුගේගොඩ ගාමිණි ස්ටුඩියෝ එකේ ගත්ත මගේ පින්තුරයක්. බස් එකේ නුගේගොඩ හන්දියට යනවා, අපේ අම්මා මගේ කොන්ඩේ කැරලි හදනවා, මුණේ  පුයර උලනවා මට තවම මතකයි .මගේ වයස එතකොට අවුරුදු තුනක් විතර ඇති. ඒ පින්තුරේ ගන්න, හෙලවෙන්නේ නැතිව එකම ඉරියව්වෙන් සෑහෙන  වෙලාවක් හිඳින්නට වූ බවත් මට මතකයි. ඒ  පින්තුරේ මම ඉන්නේ කැමරාවට ඔරවාගෙන . 

කැමරාව ඉස්සරහ විරිත්තාගෙන , පින්තුරේ ගන්න කන් බලාගෙන ඉන්න එකා හිතන්නේ මේ පින්තුරේ ප්‍රධාන නළුවා ඌ කියලා. කැමරාව පිටුපස්සේ ඉඳන් පින්තුරේ ගන්න එකා හිතන් ඉන්නේ චායාරූපයෙන් පෙනෙන්නේ උගේ හැකියාව , ප්‍රතිභාව කියලා. හැබැයි අයෙක් කලකට පෙර කියා තිබ්බේ චායාරූපයක ප්‍රධාන නළුවා හැමවිටම ආලෝකයමයි කියලා.

හැබැයි මා නම් සිතන්නේ, චායාරූපයක ප්‍රධාන භූමිකාව හැම විටම රඟන්නේ කාලය විසින්මයි කියායි. ඝනිකරණය වූ මොහොතක්, රූපයක්  ලෙස මතකයේ ගුදම් තුළ පල් වී ලැබෙන නොස්ටල්ජීක මත් බව මෙන්ම , ෂටරය දිගු කලක් විවරව තබාගෙන කාලයේ හෙවනැලි වුවද සටහන් කර ගත හැකියි. ඇලෙක්සි ටිටාරෙන්කෝ ගේ "නුවරම නවකතාවක්" The city is a novel පින්තුර පොත පුරාවටම ඔහු කතා කරන්නේ (ඔව් කතා කරන්නේ ) මේ ගැන . ඇලෙක්සි මගේ පින්තූර ගැහිල්ලට , එක්තරා නිර්මාණ නිමිත්තක් දුන් කෙනෙක් 

මාත් මේ වැනි පර්යේෂණ කීපයක් කරමින් ඉන්නේ. මේවා හොඳ පින්තූර වලට වඩා, උගත් පාඩම් කියලයි මා සලකන්නේ.  

මෙන්න මේ සබැඳිය ඔස්සේ පොඩ්ඩක් ගිහින් බලන්න . ඔබට හිතෙන දේ කියන්න .

ගතයුතු, තවත් බොහෝ පින්තූර ගැන සටහන් මනසේ මෙන්ම මගේ සටහන් පොත් පිටු අතරත් තියෙනවා. ඒත්  කාලය පින්තූර  ගන්න වෙලාවක් නැති වෙලා තියෙන්නේ



පලි: අද මේ සටහන ලියුවේ, ලියන්න හිතේ හිරවෙලා තියෙන දේ ලියලත් බැරි සහ එය නොලියා ලියන්න වෙන දෙයකුත් නැති නිසා.
පොටෝ එකක වගේම, ජීවිතේත්, අනෙක් බොහෝ දේ වලත්  අප හැමෝම හිතන් ඉන්නේ කතාවේ ප්‍රධාන නළුවා තමන් කියලා. ඒත්  අපි හැමෝම කාගේ හරි කතාවක සහය නළුවෝ කියලා එක්කෝ නොතේරීම මැරිලා යනවා නැත්නම් තේරෙන්න කල් යනවා. 

19 March 2017

බල්ලාගේ එක්ස්කියුස් එක සහ කීර්තිනාම ඉස්කෝලේ මහත්තයාගේ නඩු නිමිත්ත

ඕං 
හිටියා උදාර කොල්ලෙක් 
ඌට හිටියා හොඳ තඩි බල්ලෙක් 
පළාතේම නෑ එහෙම හොර ගෙඩියෙක්  
උගේ කනේ හිටියා තඩි මැක්කෙක්

දවසක් දා මූ  දික් කරගෙන කළු හොම්බත් . කුස්සියට පැනලා , වලඳක තිබිච්ච මාළු කූරියෙක් උස්සන්න හොම්බ දැම්මා විතරයි කුස්සි අම්මාට අහුවුනේය . ඕ  තොමෝ , ටොමියාව බෙල්ලෙන්ම අල්ලාගත්තෝය .

මෙච්චර දවසක් මම බලන් උන්නේ අතටම අල්ල ගන්න , හොර  බල්ලෝ  , අද නම් අතටම අහුඋනා . තොට අදනම් ගහේ  බැඳලා දෙන්නේ .... කුස්සි අම්මා බී වාර්තාව ඉදිරි පත් කලේ , ඇසින් දුටු සාක්කිත් අමුණලාය    

හා හා ඔබතුමි  කලබල වෙන්න එපා , දුටු සියල්ල සත්ය නොවේ ...බුහ්  බුහ්  ...හොරු අල්ලන්න නේ මහත්තයා මාව ගෙනාවේ ගෙදරට ..   

එහෙව් එකේ උඹ  කුස්සියට පැනලා ලිප්බෝක්කේ තියන ඒවා හොරෙන් කාපුවහම හරියනවද ?

  නෝනා, මෙතන තියෙන්නේ වරදවා තේරුම් ගැනීමක් . 

මොකක්ද බොල මෙතන තියෙන වරදවා තේරුම් ගැනීම 

 මේ මගේ කනේ ඉන්න මැක්කා  පේනවද ? ඕකා අර අල්ලපු ගෙදර හොර කිටියාගේ කණේ  හිටියේ කාලයක් තිස්සේ .ඔන්න ඔය  මැක්කා තමා ඔය වළඳට හොම්බ දැම්මේ. ඒ සිද්ධිය තමයි ඔබ තුමිය  මම හොම්බ දානවා වගේ දැක්කේ ... හොරකමට 
දෙන දඬුවමක් දෙන්න මේ මැක්කට  ඕං .

බල්ලා  පස්චාත් ගාතය  ඔසවා උගේ කණ  කැසුවේය

***

කීර්තිනාම  ලොකු ඉස්කෝලේ මහත්තයා 55විය තෙක්ම   ගමේ ඉස්කෝලේ ඉගැන්නුවේය . ඉන්පසු තවත් අවුරුදු හතරක් පිනට ඒ දුප්පත් දරුවන්ට  ඉගැන්නුවේය . දැනට ඔහු හිඳින්නේ ගෙදරට වී විවේක සුවයෙන් බණ පොතක් කියවා ගෙනය . එක පාරටම ගිය සතියේ දවසක පත්තරේ කියවමින් සිටි ඔහු , කෝපාවිෂ්ට වී පුටුවෙන් නැගිට්ටේය . ඉන්පසු තනියම කෝපයෙන් කියවමින් ගෙතුළ සක්මන් කරන්නට විය .. එදින සවස  ඔහු වේගවත් ගමනින් හන්දියේ මුදලාලි හම්බු වෙන්න ගියේ ගෙදර ඔප්පුවත් කිහිලි ගහගෙනය .

"මුදලාලි මේක තියාගෙන මට ලස්ස 20ක් දෙන්න " ඔහු කෙලින්ම කාරනාවට බැස්සේය 

මොකෝ ඉස්කෝලේ මහත්තයා ලෙඩක් දුකක් වත්ද ? ඔප්පු ඕනේ නෑ..  දැනට ඕනේ ගාන  කියන්න 

එහෙම බෑ මුදලාලි මේ නඩුවක් කතා කොරන්න , අබ්බගාත් මහත්තුරු අල්ලන්න සල්ලි ඕනේ 

මොකක්ද අප්පේ නඩුව ?  ඉඩම් ප්රශ්නයක්ද 

නෑ  මුදලාලි , මේක මහා අපහාස නඩුවක් . මම දානවා නඩුවක් ඕකුන්ට ලස්ස පන්සීයක් වන්දි ඉල්ලලා 

මොකක් කිව්වා ?....අපහාස  කවුද මේ ගමේ, අපේ ඉස්කෝලේ මහත්තයාට  අපහාස කලේ ?. .. අනික් අතට ඔන්න ඕවා අල්ලලා දාන්න ඉස්කෝලේ මහත්තයෝ , දැන් කාලේ හැදෙන උන් කියන ඒවා ..

නෑ  ගමේ එකෙක් නෙමෙයි .. ඕකුන් දන්නේ නෑ මගේ හැටි.

කවුරු උනත් කමක් නෑ  ඉස්කෝලේ මහත්තයෝ , ඔය අපහාස නඩු එහෙම දිනන ඒවා නෙමෙයි .

අනේ යන්න මුදලාලි , එහෙනම් ඔය මැති ඇමති වරු දාන්නේ ලස්ස සීයේ හමාරේ අපහාස නඩු තමන්ගේ කීර්ති නාමයට මදි පුංචි කමක් උනාය කියලා .. ඉතින් මගේ නමම කීර්තිනාම වෙච්චි 

දැන් මොකක්ද ඔය ඉස්කෝලේ මහත්තයාට  වෙච්ච අපහාසේ , මොකක්ද නඩු නිමිත්ත 

මේං බලන්න 

කීර්ති රත්න ඉස්කෝලේ මහත්තයා හතරට නැවු පත්තරයක මුල් පිටුවක් පයිල්  කවරයෙන් එලියට ගත්තේය . එහි එක සිරස්තලයක් රතු පෑනකින් රවුම් කර ඇත 

" මේ සියල්ලට වග කිව යුත්තේ , මහා බැංකුවේ නියෝජ්ය අධිකාරි තුමා ...."

මුං කෙලින්ම අපහාස කරන්නේ අපේ බුද්ධියට මුදලාලි මහත්තයෝ, 

(දැන් නැවතත් බල්ලාගේ කතාව කියවන්න )

05 March 2017

රූපසිංහ අංකල් ගේ ප්‍රොජෙක්ට් එක හෙවත් Project life cycle and life projects

  

රූපසිංහ අංකල්,   අපි පොඩි කාලේ , කලේ වෑල්ඩින් වැඩ . මුලින් නම් ඔහුගේ වැඩපොළට එහෙම කියලා වැඩක් තියෙනවා මට මතකයක් නෑ . ඒත් කවදා  වත් ඉවර නොවෙන ප්රොජෙක්ට් එකක් ,  බාගේට හදපු පන්සලක පහන් වැටක් නම් හැමදාම වැඩපොළේ වත්තේ අයිනක ගහකට හේත්තු කරලා තිබ්බා . 
(අහපු හැම වෙලාවකම කිව්වේ " ඕක ඉවර කරන්න ඕනේ පුතා " කියලා . )

පහු කාලේක රටේ ආර්ථිකේ විවෘත වෙලා, ක්රෝටන්  වැටවල් වෙනුවට තාප්ප බැඳෙද්දි , උණ බම්බු කඩුල්ල වෙනුවට දමාපු ගේට්ටු හැම එකක්ම හැදුවේ මොහු .  ඊට පස්සේ හොරු වැඩි වෙද්දී ජනෙල් වලට ගහපු ග්රිල් හැදුවෙත් රූපසිංහ අංකල් . 

බොහෝ විට හවසට මද පමණ සප්පායම් වෙලා ඇවිල්ලා , අපේ අප්පච්චි එක්ක කතා කර කර ඉන්නවා පැය  ගණන් . අප්පච්චි අමද්යප වෘතයක් පිරු නිසා , දෙන්නා එක්ක හරි හරියට සිගරට් බොන එක තමා කලේ . 

හැම දාම ගෙදර යනකොට  " මම ඇවිල්ල මහත්තයාගේ සිගරට් ටික ඉවර කරනවා , ඔන්න මහත්තයෝ මම හෙට නම් එනකොට මහත්තයාට  බ්රිස්ටල් පැකට් එකක්ම ගේනවා " කියලා තමා යන්නේ 

අප්පච්චි සිගරට් බීලා ලෙඩවුනා . ඉස්පිරිතාල වාට්ටුවක විඳවලා මැරුණා . මළ ගෙදර ඇවිත් රූපසිංහ අංකල් මගේ අත  අල්ල ගෙන ඇඩුවා . "මොනවා කලත් කමක් නෑ  පුතේ සිගරට් නම් බොන්න එපා " කියලා එලියට ගිහින් පැත්තකට වෙලා සිගරට් එකක් පත්තු කරන් සෑහෙන වෙලාවක් කල්පනා කර කර ඉන්නවා මට මතකයි.

පස්සේ කාලේක වැඩපොළ වැහිලා ගියා. ඔහු ජුබිලි කණුවේ හන්දියේ ත්රී වීල් එකක් එලෙව්වා . 

දශක ගාණකට  පස්සේ අහම්බෙන් මට වෙනත් තැනකදී රෑපසිංහ අංකල් හම්බවුනා . " අද නෝනාට  පැන්සන් , බෙහෙත් ටික ගන්න ආවා" කිව්වට .. සිලි මල්ල ඇතුලේ කාලේ බෝතලේ එලියට පෙනුනා.

"මහත්තයා මොකද දැන් කරන්නේ " ඊළඟ ප්රශ්නෙන් නම් මම පොඩ්ඩක් අසරණ උනා .  මුලින්ම පුතාලා , මහත්තයාලා වීම ගැන වූ සිතුවිලි ගොන්නක් වාං ඇරියා සේ ගලා ආවා. ඊට පස්සේ මගේ රස්සාව මේ මනුස්සයාට විස්තර කරන්නේ කොහොමද කියන එක හිතන්න ගත්තා . තටමලා තටමලා , මම ප්රොජෙක්ට්  කරන ව්යාපෘති කළමනාකාරයෙක්  බව කියා ගත්තා .

"දොස්තර කෙනෙක් නෙමෙයි ??...... ..(නිහඬතාවයක්). .හ්ම්ම් තාත්තට නම් ඕනේ උනේ මහත්තයව දොස්තර කෙනෙක් කරන්න ..." ඔහු බිම බලාගෙන හිමින් සැරේ කිලිටු ලේන්සුවක් ඇහැට ලං කළා .


"මුළු ජීවිතේම ප්රොජෙක්ට් එකක් තමා මහත්තයෝ ... මමත් අපේ දුවව දොස්තර කෙනෙක් කරන්න නේ ඉගැන්නුවේ. ඒත්  ඒක ඉවර කර ගන්න මට සල්ලි තිබුනේ නෑ මහත්තයෝ..ඉතින් මම ඒකිව සල්ලි තියෙන බිස්නස් කාරයෙකු ගේ ඇඟේ ගැහුවා . දැන් උන්ට සල්ලි තියෙනවා , මගේ මුණුපුරා ඇඩ්වාන්ස් ලෙවෙල් සයන්ස් කරන්නේ .... දොස්තර කෙනෙක් වෙන්න .."



පලි : ව්යාපෘතියකට නිශ්චිත ඉලක්කයක්  ඇත . එවන් ව්යාපෘති එක්වූ තැන ඇත්තේ වැඩසටහනකි . 

එක අතකට මුළු ජීවිතයම ප්රොජෙක්ට් එකකි . එක් එක්  කඩඉම් ඇත . ඇතැම් ඒවා සාර්ථකව ලඟා කරගනිමු ඇතැම් ඉලක්ක වලට ලඟා වීමට අපට නොහැකි වේ .

වැඩසටහනක ඇත්තේ ඉලක්ක නොව නිශ්චිත ප්රතිලාභයන් ය . එක ව්යාපෘතියක් අසාර්ථක වුවද , වැඩසටහනක ඒ ප්රතිලාභ ලැබෙන තෙක් අලුතින් අලුතින් ව්යාපෘති දියත් කෙරේ . ව්යාපෘති කළමනාකරු වෙනස් වුවද වැඩසටහන දිගටම ක්රියාත්මක වේ .

මා මේ දවස් වල කල්පනා කරන්නේ , වැඩසටහනක් ලෙස පරම්පරා ගණනාවක් ඔස්සේ දිවුණු දේ ගැනය . ඇතැම් දේ මානුෂිකය , තවත් දේ දේශපාලනිකය .

26 February 2017

චතුරලා , අපි සහ බක්කි පරෙයි

I පෙර කියවීම 

සමහර සබ්ජෙක්ට්ස් ගැන ලියන්න කල් ගත්තම , ඒ ප්රස්තුථ  කල් ඉකුත් වෙනවා .

ඒත්  සමහර සබ්ජෙක්ට්ස් ගැන දිගට හිතපුවහම , ඒවා විසි කරන්න ලෝභ හිතෙනවා . එතකොට කරන්න වෙන්නේ දෙහි වගේ , ලුණු දාලා අව්වේ වේලලා ලුනුදෙහි හදන එක .


චතුරලා 
හීනෙන්වත් නොසිතු 
සිතුම් ..
කල්පයක්වත්
පුරා නොහි 
පෙරුම් .
කෙරුම් ප්රවාද 
බදාම අනා 
කාස්ටක අව්වේ 
උන බම්බු පලංචි දිගේ 
කරතබා උඩට ඇද 
උන්ගේ පැතුම් 
හීන මන්දිර 
තනන
කොට කම්කරු 
අපි 

ඉනික්බිති 
ඒ මන්දිර පවුරු මෙපිට 
දොරටු අබියසට වී
හීතල කිරිගරැඬ
දෙවොල් තුළ 
බොල් පිළිම 
නිදිවරා රකින 
උස සිකුරිටිත් 
අපි 

***


 බා බා ගාද්දී 
උන් 
නවතා ගුවන් කරනම්
මෙලවූ මිට 
පොරි යයි රැවටී
උන් පා අබියස
දනිහෙට පහලින් 
එක්වෙන 
රොක්වෙන 
බක්කි පරෙයියෝ

19 February 2017

මලිත් ට ගහද්දි චංචලා ඇඩීම , පංතියට උණ ගන්න මොනිටර්ට ගැසීම සහ ජිජැක්



මුලින්ම click here

.

.
.
.
.
.
.
.
.
.
.
.
.

මලිත් ට ගහනකොට ඇඬුවේ චංචලා උනාට , මම ගිය පිරිමි ඉස්කෝලේ එහෙම උනේ නෑ . 

පංතියේ  වම හා දකුණ බෙදිලා ගීතයෙන් ගීතය ... වම් කොණේ ආර් ආර්ට ( R R ),  කියන කියන අකුරට සිංදුවක් තියෙනවා . එකපාරටම  ගුරු එන මග ඔත්තු බලන්න හිටි ජයේ  දුව ගෙන ආවේ "කුරේ එනෝ" කියා ගෙන. ආර් ආර් සිංදුව  මග බ්‍රේක්  ගහලා නවත්තගත්තා .

" කවුද සින්දු කිව්වේ " කුරේ සර් වේවැල වන වන ඇහුවේ පංතියට  ඇතුළු වෙන ගමන්ම . සභාව නිහඬයි .

" අන්තිම සැරේට අහන්නේ , කවුද මේක බයිලා මඩුවක් කර ගත්තේ " . සභාව තවම නිහඬයි .

" කවුද මොනිටර් ?  ". ජයේ නැගිට්ටේ හිමිහිට 

"හරි එනවා මොනිටර් මෙහාට , දැන් තමුසේ කියනවා , කවුද සින්දු කිව්වේ " . 

" දන්නේ නෑ  සර් ". .. ඔහු කිව්වේ ඇත්ත . මොකද ඔහු හිටියේ පන්තියෙන් එළියේ  , ඔත්තු බලමින්.

"එහෙනම්  , තමුසෙට තමයි මම අද ගහන්නේ... මුළු පන්තියටම උණ  ගැනෙන්න ."

ඊට පස්සේ.. චාටස්ය .. පටාස් ය .  ගුරුතුමා ගිය පසු පන්තියම මුලින්ම කලේ ජයේව බයිට් එකට ගැනීමය . ඉන්පසු කලේ කුරේට එරෙහිව පෙළ ගැසීමය . 

මෙය බොහෝ දින වල අපේ පන්තියේ සිදුවීමයි . නමුත් සින්දු කීම නැවතුනේ වත් , මොනිටර් විසින් පන්තිය පාවා දුන්නේ වත් නැත . සිදුවුයේ මොනිටර් ටිකක් ඝනකම කලිසමක් ඇඳීමට පුරුදු වීමයි .  මොනිටර් ගේ  ගුටි කෑමේ ශක්තිය වැඩිවීමයි . පන්තියේ උන් අතර ඔහුගේ නායකත්වය ගැන වැඩි වැඩියෙන් පැහැදීමක් ඇතිවීමයි . ජයේට  ඇති පිළිගැනීම  වැඩිවීමයි .බයිලා මඩුව දිගටම යාමයි . පහු වෙත්ම කුරේ සර් ගේ වේවැල් පහරත් එන්න එන්නම ලිහිල් වූ බවක් ද පෙනුනි . 

***

"යම් සංස්ථාපිතයකට පහර දීමේදී , එහි මුදුනට නොව පාදමට පහර දෙන්න . ඒ මක්ද යත් , මුදුනට පහර දීමේදී වන්නේ ඒ සංස්ථාපිතය වඩ වඩාත් ශක්තිමත් වීම " යැයි  , ජිජැක් කියා ඇත්තේ .....ඉංග්‍රීසියෙනි .

(මෙතැනින්  පොඩ්ඩක් කැලේ  පනින්නට මට අවසර .  මම,  ජිජැක් වේවා , ඕෂෝ වේවා අදහන්නෙක් නොවෙමි. නමුත් මට හරි යයි සිතෙන දේ ඔවුන් ගේ චින්තනයන් තුළ  තිබේ නම් එය පිලිගනිමි . තරමකට හෝ අදහන්නේ , "මා අදහන්න එපා " යයි කියූ බුදුන් පමණකි . එහි ඇති උත්ප්‍රාසයද දනිමි .

මා වැඩිපුර කියවන්නේ මා වැඩිපුර එකඟ නොවන අයගේ සටහන්ය, අසන්නේ මට සාමාන්‍යයෙන් අහනකොට ඇඟේ  මාළු නටන උන්ගේ දේශනයන් ය. එය මගේ අදහස් වර්ධනයට , පෝෂණයට මෙන්ම ඉවසීම වැඩිදියුණු වීමටද හේතුවේ යයි  මා සිතන බැවිනි . ජිජැක් එවැන්නෙකි ).

බොහෝ තැන්  වල වෙන්නේ ජිජැක් කියා ඇති දේ ම යයි මට සිතේ . උදාහරණයක් ලෙස එජාපයේ ලිබරල් ක්‍රමයට , ඊනියා බටහිර ගැති  බවට විරුද්ධව ගහන්නේ රනිල්ගේ ශාරීරික අභිනයනටය . ශ්‍රීලනීපයේ අවස්ථාවාදී , වැනෙන සුළු දේශපාලනයට  විරුද්ධව ගහන්නේ මයිත්‍රී සිටගන්නා විදියටය  . ජෙප්පන්ට ගහන කොට ගහන්නේ අනුරගේ අයර්ලන්ත කනෙක්ෂන් එකටය  .  ආශ්චර්යයට  ගහන කොට ගැහුවෙත් මහින්දටය . නමුත් ජිජැක්  කියන්නේ පාදමට නැත්නම් පදනමට ගහන්න කියලා ය . ඒ කියන්නේ ගහන්න ඕනේ  නායකයන්ව පවත්වා ගෙන යන , පැවැත්ම ස්ථිර කරන සිස්ටම් එකටය , උන්  කර උඩ තියාගෙන යන උන්ටය . නමුත් ඒක  කරන්න ගියාම වැඩේ එය පොඩ්ඩක් කිරිමිනෙල් වෙන්නේය  . ඒ,  ගැහීම ටිකක් ගැඹුරට ගහන්න වෙන බැවිනි . ඒ කියන්නේ අපේ මෝඩකම් ගැන කතා කරන්න වෙන නිසාය .  අපටත් වගකීම බාර ගන්න වෙන නිසාය . අපි වෙනස් නොවී , සිස්ටම් වෙනස් නොවෙන බවේ යථාර්තය අපට බාර ගන්න වෙන නිසාය . ( මට මතක් වෙන්නේ , අර වසා ඇති කවුළුවේ එකම තැන හැපි හැපී එලියට යාමට මගක් සොයන මැස්සා ගේ කතාවයි )

දැන් තියෙන සිස්ටම් එක, අපිට පහසුය , convinientය . කප්පරක්  වැරදි තිබුනත්  වැරදි කාරයෝ නැත. 

අපේ පැත්තෙන් , වැරැද්ද,  නිවැරදි  තීරණ නොගන්නා ආණ්ඩුවේ යයි සිතා සැනහෙමු . ආණ්ඩුව කාලයක් තිස්සේ කියන්නේ , උන්ව පත්කළේ අපි නිසා වැරැද්ද අපේ කියාය.  දැන් වැඩේ දෙපැත්තටම එකඟ විය හැකි තැනකට ගෙන විත් , ඔක්කොම කුණු ගං  මෝයට දමා ඇත ....වැරැද්ද තීරණ ක්‍රියා නොකරන නිලධාරීන්ගේය . උන්ව ඒ තැන්  වල තියාගෙන ඉන්න එවුන්ගේවත් . ඒ සිස්ටම් එකම පෝෂණය කරන උන්ගේවත් නොවේය .

ඉතින් බල්ලෝ ඉඳ හිට බිරුවද , ගැල  ඉදිරියටමය .

***
යලිත් සිතා බලන කළ  , අපේ පන්තියේ මොනිටර් ලෙස අප පත් කර ගත්තේ , ගුටිකනම මුණක් ඇති අයව බවද , මොනිටර්  ගහන කොටම  , ඒ මගින් බයිලා මඩුවේ පැවැත්මට කිසිම බලපෑමක් නොවන බව , එදා කුරේ සරුත් දැන  සිටි  , මට අද සිතේ 

09 February 2017

තොරතුරු දැන ගැනීමේ පනත හෙවත් Any information on need to know basis

ගිය සතියේ අහම්බෙන් වගේ යූ ටියුබ් එකේ සැරි  සරද්දී අස ගැටුණු අලුත් පාර්ලිමේන්තුව වැඩසටහනක් විය . කට්ටිය කතා කලේ තොරතුරු දැන  ගැනීමේ පනත ගැනය  .  (සංඛ විටෙන් විටේ ටොයිලට් බ්රේක් ලබා ගැනීමයි , චාපා ගේ අහස කඩා වැටෙනවෝ කතාවයි හැරුණු කොට .. ඊනියා විද්වතුන් ( ඊනියා නොව ඊයා ය ) බොහෝ විට ගෙන ආවේ " ඔබේ ලංකට්  එක රතු පාට නිසා ඔබේ තර්කය වැරදියි "  වගේ තර්කම පමණි . එහෙත් ඒ වැඩසටහනින් පසු මා මනසට වද දුන්නේ , ඇත්තටම මේ පනත කාටද කියන ප්‍රශ්නයයි . 

***

පෙබරවාරි හතර වෙනිදා මා රූපවාහිනිය  ඉදිරියේ වාඩිවුයේ  සජීවීව නිදහස් උත්සවය නැරඹීමටය .  

පෙරහැර එනකන් , අයිස් කිරින් කාරයෝ , කඩල/ රටකජු කාරයෝ මෙන්ම බේබි නාරං කාරයෝද පැමිණ කෑගසන්නට විය . කස කාරයෝ , කොඩි කාරයෝ යනකං මා පොඩි නින්දකට වැටුනෙමි . එක් වරම රූපවාහිනී තිරයේ මා දුටුවේ ජනාධිපති තුමා  ආචාර පෙළපාලිය නරඹමින් සිටින අයුරුය .

" ස්  ස් ... මේ ..... ලොක්කා ...හරි ඉස්මාට් ඈ    "මම රුපවාහිනිය තිරය ඔස්සේ ඔහුට කතා කලෙමි .. එතුමා වට පිට බැලුවේය ...

"ආ ජේපී නේ .... නෝනේ ..මේ අර බ්ලොග් ලියන ජේපී   ... " නමුත් මැතිනිය ඇස්  කොණෙන් බලා මද සිනාවක් පෑවද වැඩිය කලබල වෙන්නට ගියේ නැත . 


( .. ඔව් ඔව් මම දන්නවා , දැන් ඔබ කියාවි බොරු කියන්න එපා යැයි .. අසාවී එහෙම කොහොමද ටීවී එක හරහා කතා කරන්නේ කියා?... ඒත් ඔබ නොදන්නවාට,  මෙහෙම හිටියට , මම,  ගුප්ත ශාස්ත්‍රයන්  කීපයකම මනා හැකියාවක් ඇත්තෙක්මි .  . සමාන්තර විශ්වයේ වෙන දේ දැන  ගැනීම මෙන්ම  දොස්තර හොඳ හිත ගේ  සත්තුන් සමග කතා කිරීමේ රහසද  ඇතුළුව තවත් රහස් ශාස්ත්‍ර කිහිපයකම වර්කින් නොලේජ් එකක් ඇත්තෙමි . කොටින්ම අර පහුගිය කාලයේ නොයෙක්  ප්‍රදේශයන්හි දිස් වූ, පාවෙන පීරිසියේ පැමිණි පිටසක්වල ජීවින්, මෙරට ආයෝජනයට අගමැති තුමා ගේ ආරාධනය පිළිගෙන , දන්කොටුව ප්‍රදේශයේ පාවෙන පීරිසි පැක්ටේරියකට මුල් ගල් තැබීමට ආ කට්ටියක් බව සපථ ( හැමෝම මේ දවස් වල වැඩියෙන්ම කරන්නේ සපථ කරන එකය ) කරගත්තේ එවැනි විස්ස සක්තියක් පාවිච්චි කර ඔවුන් හා කතා කිරීමෙනි .)  

 මරූ සූට් එක ජනාධිපති තුමා .  මම නැවත කීවෙමි 

ටැංකු ජේපී ... අපේ අගමැති තුමා තමා රෙද්ද දුන්නේ හිටං ... මහින්ද රාජපක්ෂගේ ටේලර් තමා මැහුවේ හිටං . 
මට තිබ්බේ ඇඳ ගන්න එක විතරයි
හැබැයි ටිකක් විනිවිද පේනවා වැඩිද මන්දා 

හැ හ් , හුටා හිටං , යටට ශෝටක් ඇන්දෙත් නෑ  යහපාලනේ කියලා 

ජනාධිපති තුමා එක වරම හිඳ ගත්තේය  . ( පසුව බුකියේ අසමජ්ජාතියෝ අවලාද නැගුවේ  , ඉඳගෙන උත්තමාචාර පිලිගත්තය කියලාය . නමුත් හැබෑවටම  සිදුවුනේ මෙයයි  )

මේ ජනාධිපති තුමා මම මේ අහන්න කියලා හිටියේ , අර ඕපා දූප සොරි ..තොරතුරු දැන ගැනීමේ පනත හෙට ඉඳන් ක්‍රියාත්මකයි නේද 

ඔව් ඔව් , ඔන්න අපි කිව් විදියට වැඩ 

ඇත්තටම ඒක  කාටද ?

ඇයි  ජේපී ඕක ගැන පෝස්ට්  එකකුත් ලිව්වා නේද හිටං  (http://pinchpoints.blogspot.hk/2015/05/be-careful-what-you-ask-for.html..

ජනාධිපති තුමාට ඒකත් මතකයි... නෑ මම අහන්නේ ඕක ඇත්තටම කාටද  
වැදගත්

ඇයි  ජේපී  අඩුම ගානේ පත්තරයක් වත් කියවන්නේ නැද්ද රට තොට තොරතුරු ටිකක් දැන ගන්න ...හැක් හැක් .. විද්වත්තු කිව්වේ.. පාරට දාපු තාර මාත්‍රාව , ගොවියාට  පසේ සංයුතිය  වගේ වැදගත් හැම දේම දැන ගන්න පුළුවන් වෙනවා කියලා 

ඒ වුනාට .. අනේ මන්දා .. 

ඇයි ? ජේ පී කියන්නේ ඒවා වැදගත් නැද්ද දැන ගන්න ?.. කොටින්ම ඔන්න ඔහේට ඕනේ නම් අපේ නෝනා දවල්ට ඉවුවේ මොනවද කියලා දැන ගන්න උනත් පුළුවන් , පෝර්ම්  එකක් පුරවලා බාරදෙන්න විතරයි තියෙන්නේ 

ඉතින් ජනාධිපති තුමා , දැන් ඔය ගොවියන්ගේ උදාහරණේ ගමු , දැන් ඒ කට්ටිය පෝර්ම් පුරවලා ආණ්ඩුවේ කන්තෝරු ගානේ ගියාම , ගොවිතැන් කරන්නේ පොලිසියෙන්ද 

ඔව් ඔව් .. දැනටමත් පොලිස්පතිතුමා ඒකට කට්ටිය ලෑස්ති කරනවා . ඔන්න කලිසම වෙනුවට කාකි සරමකුත් යෝජනා කරලා තියෙන්නේ . සරමේ ඉස්සරහ කොනෙන් අල්ලලා කකුල් දෙක අස්සෙන් පිටිපස්සට නවලා අමුඩේ වගේ ගහගන්නවා 

හරියට නීතිය නවනවා වගේ 

ඕකනේ ජේ පී එක්ක බෑනේ හිටං

හරි ඒක  පැත්තකින් තියමු , දැන් ඔය තොරතුරු ලබා දෙන්න රජයේ ආයතන ලෑස්තිද 

එහෙනම් , අපි පෝර්ම්  ප්‍රින්ට් කළා , හැම දෙපාර්තුමේන්තුවකම ගැහුවා බෝඩ් එකක් 
සිංහලෙන් , අනුන්ගේ දේ සෙවීම කැත පුරුද්දකි .  ඉංග්‍රීසියෙන් මයින්ඩ්ස් යු වර් ඕන් බිස්නසස් 

දෙමලෙන් ?

ඔව් ඔව් . මේ ට්‍රාන්ස්ලේට් කරන්න යවලා තියෙන්නේ ... මේ ට්‍රාන්ස්ලේටස් ලා තමයි රටේ ඔක්කොම පරක්කු කරන්නේ  හිටං . දැක්කනේ සීමා නීර්ණය වැඩේ 

දැක්කා දැක්කා ... ජනාධිපති තුමා දැන් මේකෙන් විදේශීය කුමන්ත්‍රණ කාරයෝ අතට එහෙම වැරදි තොරතුරු යයිද 

පිස්සුද ඕයි  , උන්ට තොරතුරු අපෙන් ගන්න ඕනේ යෑ 

ඒකත් එහෙමද ... ජනාධිපති තුමා ඇත්තම කියන්න .. මේ පනත ඇත්තටම වැදගත් කාටද 

(එතුමා හඬ තවත් බාල කළේය ) .. ජේපී ගෙනුත් මොකුත් හංගන්න බෑ නේද හිටං ... ඇත්තම කියනවනම් මේක ඇත්තටම වැදගත් මටම තමා ... මොකෝ දැනට මම ගොඩක් දේවල් දැනගන්නේ පත්තරෙන්නේ හිටං  . ඉතින් දැන් මට පෝර්ම්  එකක් පුරවල දීලා ඕනෑම  දෙයක් දැන ගන්න පුළුවන්නේ 

හැ හ් , ඕනෑම දෙයක් දැන ගන්න පුළුවන් වෙයිද 

ඔව් ඔව් , අගමැති තුමාම සපථ කරලාම කිව්වා හිටං , ඕනෑම දෙයක් , ඕනෑම වෙලාවට, නීඩ් ටු නෝ  බේසිස් ම ලබා ගන්න පුළුවන් කියලා 

එහෙනම් සපථ වෙලාම තියෙයි හිටං 

මට වාක්‍යය අවසන් කිරීමට ලැබුනේ නැත , මා බිරිඳ ගේ සුමුයුරු ආමාන්ත්‍රණය ඈතින් එන කව් පදයක් මෙන් ලාවට ඇසෙන්නට විය .

" මේ ටීවී එක දා ගන්නවා රටටම ඇහෙන්න, ඊට පස්සේ එක ඉස්සරහ ඉඳගෙන නිදා ගන්නවා .."

"..ඥාන වීර්ය වඩවමින රැගෙන යනු අප ..." මම ජාතික ගීය  ගයනට  , ඇස් වසා ගෙනම,  මගින් එක්වුනෙමි